Vëllezërit shqiptarë, bosë të kroçerave të seksit në Greqi

Vëllezërit shqiptarë, bosë të kroçerave të seksit në Greqi




Policia greke shkatërron rrjetin VIP të trafikut të prostitucionit, që drejtohej nga dy shqiptarë



GREQI - Dy-tre vjet të shkuara, kur Aleko me vëllanë hapën “Zyrën e takimeve erotike” me reklama vajzash në rusisht, askush nuk e kishte imagjinuar se do të krijonin monopolin e shfrytëzimin seksual në Athinë, duke korrur jo pak, por 3.5 milionë euro në vit fitim. Dy shqiptarët arritën përmes një organizimi perfekt të çojnë në maja biznesin e seksit, duke arritur të kenë nën kontroll gjithë mjediset VIP të Athinës. Për më tepër, arritën të krijojnë dhe “kroçerat e seksit”, duke u lidhur me kompani turistike që lëshonin jahte me qira, të cilat më pas shfrytëzoheshin për orgji seksuale. Jahtet luksoze u shndërruan në shtëpi publike luksoze e pjesë e këtyre tureve seksuale kanë qenë plot emra të njohur të shoqërisë së lartë helene. Por një gabim i zuri “mat” dhe gjithçka u shemb si një fortesë prej rëre. Mëngjesin e djeshëm, forcat antitrafik të policisë së Athinës arrestuan tre menaxherët kësaj organizate, në dukje legale, dy grekë dhe një 33-vjeçare nga Turqia, si dhe dhjetë anëtarët e tjerë të organizatës kriminale, që të gjithë shqiptarë. Gjithçka u arrit përmes operacionit të koduar “Djalli”. Megjithatë, policia dështoi në arrestimin e 34-vjeçarit Aleko, (mbiemri nuk u konfirmua nga policia) dhe vëllait të tij, pasi ata arritën të zhduken, duke u larguar nga Greqia në drejtim të Shqipërisë. Në kërkim është shpallur edhe një 50-vjeçare ruse, e cila furnizonte rregullisht dy “pronarët” shqiptarë me vajza nga vendet e Lindjes.

***

Policia e Athinës konfirmoi dje: “Dy vëllezërit shqiptarë kanë kaluar kufirin dhe sinjalet nga autoritetet shqiptare kanë ardhur se prangosja e tyre në Shqipëri është çështje orësh. Krerët e organizatës janë dy vëllezër të shtetësisë shqiptare, 34 dhe 29 vjeç, të cilët janë në Shqipëri dhe ne kemi lëshuar urdhër-arreste kundër tyre”, - tha zyrtarisht policia. Policia greke ka identifikuar si klientë të zyrës së seksit të dy shqiptarëve, mjekë të njohur, profesorë me grada, zyrtarë të lartë të Athinës, biznesmenë shumë të njohur, avokatë, prokurorë dhe gjykatës, aktorë dhe njerëz të tjerë të botës së artit e kulturës. Policia refuzoi çdo përpjekje të gazetarëve për të publikuar disa nga emrat e tyre, por pranoi se ata janë njerëz tejet të njohur në qarqet publike greke. “Vajzave u bliheshin biletat e avionit dhe pajiseshin me dokumente qëndrimi dhe rekrutoheshin, pasi më parë u ishte premtuar punë, si kamariere në restorante të ishujve”, - sqaroi policia, e cituar nga e përditshmja e Athinës “Expresso”. Për të përballuar fluksin e punës, ishin marrë nëntë apartamenteve me qira në disa lagje të Athinës. Në rrethana ende të paqarta, të gjitha vajzat ishin pajisur me leje qëndrimi, por ato u mbaheshin “peng” nga menaxherët e bandës kriminale.

***

Dy vëllezërit shqiptarë ishin lidhur me një 50-vjeçare ruse dhe në bazë të paktit mes tyre, ajo merrte përsipër t’i furnizonte me vajza nga Rusia dhe vende të Kaukazit, duke marrë në këmbim përqindje fitimi. Në shumë gazeta të përditshme të Athinës vendoseshin njoftime për takime erotike dhe jepeshin numra kontakti. Në pjesën më të madhe, kjo “punë” kryhej në hotelet e Athinës dhe më rrallë, kundrejt një pagese më të lartë, në shtëpitë e klientëve. 10 për qind e shumës së fituar u kalonte menjëherë vajzave. Po aq merrnin shoferët që rekrutoheshin për shërbimin taksi. Pjesa tjetër prej 80 për qindësh dorëzohej në arkën e zyrës së takimeve erotike. Nga kjo shumë, 20 për qind i ndanin 50-vjeçarja ruse dhe tre menaxherët e “zyrës”, kurse 60 për qind i merrnin dy vëllezërit shqiptarë, pronarë të biznesit. Policia tha se për të kryer operacionin “Djalli” mori në pyetje dhe mblodhi prova e dëshmi nga rreth 150 persona.

Marrë nga agjencia e lajmeve NOA





Rrjeti i seksit



Hetimet 90-ditore

Fundi i rrjetit të dy shqiptarëve ka nisur tre muaj më parë, kur në zyrën antitrafik të policisë së Athinës mbërriti në rrugë operative një informacion për afera të dyshuara prostitucioni, përmes njoftimeve për takime erotike. Këtu ka nisur edhe hetimi 90-ditor, që përfundoi mëngjesin e djeshëm. “Ne arritëm lehtësisht te fijet e rrjetit, por vonuam operacionin, pasi kishim si qëllim identifikimin dhe kapjen e pronarëve të organizatës, në dukje legale”, - deklaroi policia e Athinës në një dalje për gazetarët.





Vëllezërit



Rrjeti, bllokohen 1.5

mln euro në Tiranë



GREQI - Operacioni “Djalli” nisi mbrëmjen e së enjtes, kur dy agjentë policie u maskuan si klientë dhe mbyllën një takim për të bërë seks kundrejt pagesës me dy vajza. Ata u futën në një hotel të Athinës dhe atje “u detyruan” të shndërrohen në klientë realë, deri në momentin që duhej bërë pagesa për prostitutat. Në këto momente, operacioni u shtri në nëntë apartamentet e identifikuara, zyrën e takimeve erotike, në portin e jahteve, në kalatat 2 dhe 4 të “Marina Alimos”, si dhe vilën e Alekos dhe banesën e vëllait të tij 29-vjeçar. Në zyrën e maskuar si kompani shërbimi për udhëtime turistike me anije me vela dhe jahte u gjetën 12 vajza, që të gjitha nga vendet ish-sovjetike. Njëra prej tyre pranoi të bashkëpunojë me policinë dhe depozitoi kërkesë për azil. Policia zbuloi se 40 vajza aktivizoheshin në tregtinë e seksit në mënyrë të përditshme, por në total, 100 vajza ishin aktive në këtë “profesion”, si dhe 23 taksixhinj të punësuar. Totali i xhiros ditore ishte nga 12 deri në 15 mijë euro dhe xhiroja vjetore jo më pak se 3.5 milionë euro. Policia tha se të tilla shuma shpjegonin edhe faktin si dy shqiptarët kishin në llogari bankare 2.5 milionë euro dhe gjashtë anije me vela. Në vilën e Alekos u gjetën dhe sekuestruan 63.680 euro. Por sipas policisë, ajo që “do t’u djegë” më shumë dy shqiptarëve është gjetja e shumë dokumente, blloqe shënimesh me adresa dhe emra të personave të përfshirë në trafik si klientë. Po ashtu u sekuestruan një makinë veturë luksoze “Porsche Cayenne”, një tjetër “Dodge”, tri motoçikleta “Harley Davidson”, si dhe një makinë “BMW”, që të gjitha të dy vëllezërve shqiptarë. Ndërkohë, në dy banka private në Shqipëri, dy shqiptarëve iu gjet dhe iu bllokua shuma prej 1.5 milionë eurosh. Policia konfirmoi se pas të dhënave të sjella nga policia shqiptare, u provua se dy shqiptarët kanë kryer një investim prej 2.5 milionë eurosh në Tiranë, por nuk u konfirmua objekti i këtij biznesi.



Jahtet

Veç 6 anijeve me vela, dy shqiptarët merrnin me qira shpesh jahte luksoze për udhëtime 2 a 3-ditore në ishullin Egje. Ato ishin ekskluzivitet i bosëve të biznesit dhe artit në Athinë dhe përfshirja e tyre në orgjitë seksuale, bëhej me kërkesë të tyre, në konspiracion të plotë.