“Lagunën na e bleu Aldo Bare për 60 mijë lekë”

“Lagunën na e bleu Aldo Bare për 60 mijë lekë”



TIRANË - Një nga punonjësit e Ndërmarrjes së Peshkimit në Lagunën e Karavastasë ka pranuar dje para Gjykatës së Krimeve të Rënda, se aksionet e tij ia kishte shitur Aldo Bares. Llambi Ndini, i thirrur nga prokuroria si dëshmitar, nuk ka mundur të kujtojë shumë detaje rreth transaksionit mes 90 punonjësve të kësaj ndërmarrjeje dhe Alfred Shkurtit, madje dhe emrin e Bares me zor e ka kujtuar. I pyetur nga gjykata rreth shitjes së lagunës nga aksionerët, dëshmitari tha se kujtonte vetëm që personi me emrin Aldo Bare u kishte dhënë nga 600 mijë lekë të vjetra të gjithë punonjësve të Ndërmarrjes së Peshkimit dhe kështu ishte bërë pronar i ligjshëm i lagunës në Divjakë. Ndërsa i pyetur rreth mënyrës sesi Aldo Bare u kishte kërkuar të blinte sipërfaqen e konsiderueshme të tokës në bregdet, dëshmitari pohoi se atyre nuk u ishte bërë presion, ndërsa e kishin shitur pjesën e tyre, edhe pse shuma e parave të ofruara ishte tepër e vogël në krahasim me çmimin e tokës në këtë zonë. Me kaq ka përfunduar dëshmia e Lambi Ndinit, ndërsa gjykata ka vendosur të shtyjë seancën për dëgjimin e dëshmitarëve të tjerë të akuzës. Laguna e Karavastasë, një nga lagunat më të mëdha në vend, aktualisht është e sekuestruar me vendim gjykate. Pas arrestimit të Aldo Bares në Turqi, ish-Ndërmarrja e Peshkimit u sekuestrua nga prokuroria, duke e konsideruar atë si pronë të vendosur nga aktiviteti kriminal, edhe pse pronari me dokumente ishte e fejuara e Bares, Denada Kodra. Laguna aktualisht administrohet nga një ish-kandidat për deputet i Partisë Agrare Ambientaliste, pasi ka marrë licencën për shfrytëzimin e saj 10-vjeçar.

L. Bakillari

Mare nga gazeta Korrieri.