Apolonia, KE jep 1.1 milionë dollarë

Apolonia, KE jep 1.1 milionë dollarë
» Dërguar më: 09/06/2009 - 11:13



Irma Hoxha




FIER Parku Arkeologjik i Apolonisë, në Fier përfiton fondin më të madh ndër vite. Këshilli i Europës i ka thënë OK-in një projekti të hartuar nga drejtuesit e këtij parku, ndërsa do të investojë një shumë prej 1.1 milionë dollarësh për restaurimin e godinës së muzeut. Lajmi bëhet publik nga drejtori i Parkut Arkeologjik të Apolonisë, Marin Haxhimihali. "Muzeu i Parkut Arkeologjik të Apolonisë është tej mase i amortizuar. Prej vitesh nuk është ndërhyrë për restaurimin e tij, dhe kjo për shkak të mungesës së fondeve. Për pasojë, dhjetëra objekte që janë nxjerrë prej vitesh nga nëntoka e këtij qyteti antik rrezikojnë shkatërrimin nga lagështira e madhe të zonës", - thotë Haxhimihali. Ndërkohë, ai deklaron se këto probleme tashmë do të marrin fund, pasi KE-ja ka dhënë fond të mjaftueshëm për restaurimin e veprave të artit. "Me investimin që pritet të bëhet, Këshilli i Europës krijon mundësinë për ruajtjen e kësaj pasurie si dhe të siteve arkeologjike", - shprehet numri një i Parkut Arkeologjik të Fierit. Mësohet se akordimi i fondit, që kap vlerën e 1.1 milionë dollarëve, u bë pas verifikimit nga afër të situatës dhe gjendjes së krijuar në parkun në fjalë. Sipas Marin Haxhimihalit, dy ekspertë të fushës së arkeologjisë nga Bullgaria dhe Belgjika konstatuan nevojën për ndërhyrje emergjente me investime. Bazuar në relacionin e përpiluar të dy specialistëve dhe projektit të hartuar nga drejtori Haxhimihali, KE-ja dha shumën më të madhe ndër vite për Parkun Arkeologjik të Apolonisë. Ky park konsiderohet si një nga qendrat më të rëndësishme arkeologjike të Shqipërisë. Kjo, për faktin se në këtë vend gjenden gjurmët e para të zhvillimit urban në Iliri. Qyteti antik i Apolonisë është themeluar në shekullin e gjashtë para Krishtit dhe vizitohet nga mijëra turistë të huaj çdo vit. Gjithashtu, Apolonia numëron vizitorë të shumtë nga rrethe të ndryshme të vendit tonë.

Mare nga gazeta Shqiptare.