Berisha dhe Thaçi - TUNELI U KRY!

Berisha dhe Thaçi - TUNELI U KRY!




Durrës-Kukës, Berisha dhe Thaçi përuruan hapjen e tunelit historik. Gazeta Libertas njofton se më në fund është hapur tuneli i Kalimashit, në pjesën ku gërmimet e bëra nga të dy krahët bashkohen. Gjithshka ishte gati për inaugurimin simbolik të hapjes së korridorit strategjik Shqipëri-Kosovë disa orë para ceremonisë së sotme. Kryeministri Sali Berisha dhe homologu i tij kosovar, Hashim Thaçi, përuruan mes ovacionesh nga të ftuar e të pranishëm, gazetarë shqiptarë e kosovarë, hapjen e njërit prej tuneleve të Kalimashit. Hapet tuneli! Shqipëria e Kosova “bashkohen” në Kalimash - Kryeministri shqiptar Sali Berisha dhe ai kosovar Hashim Thaçi kanë realizuar takimin historik në tunelin e Kalimashit, duke simbolizuar në këtë mënyrë “bashkimin” e dy vendeve në Kalimash. I hipur mbi një buldozer kryeministri shqiptar Sali Berisha ka rrëzuar murin simbolik që ndante tunelin e Kalimashit duke çelur zyrtarisht atë. Në këtë ceremoni ishte i pranishëm edhe kryeministri kosovar Hashim Thaçi. Ishin të pranishëm edhe kryeparlamentarja Topalli, zonja Liri Berisha, ministri i Transporteve Sokol Olldashi, ministria e Integrimit, Majlinda Bregu, po ashtu e pranishme ishte edhe mbesa e ish-presidentit amerikan Ajzenhauer. Ndërsa delegacioni kosovar u përfaqësua nga kryeministri Hashim Thaçi, ministri i Transporteve Fatmir Limaj si dhe 18 anëtarë të tjerë.
Ky tunel është segmenti më i rëndësishëm i rrugës që lidh shqiptarët, asaj Durrës-Kukës-Morinë.
Puna për hapjen e këtij tuneli nisi që më 25 maj 2007 nga kompania amerikane “Bektel” dhe kompania nënkontraktuese turke “Enka”.
“Bektel-Enka” ka rritur ndjeshëm ritmet e punimeve edhe në sektorë të tjerë, si përfundimi i 27 urave me një gjatësi prej më shumë se 5 kilometra në gjithë segmentin e rrugës prej 60.4 kilometrash, Rrëshen-Kalimash.
Rruga Durrës-Kukës- Morinë, një projekt ky i qeverisë shqiptare, është vepra më e madhe inxhinierike në historinë e Shqipërisë.
Ky projekt ka punësuar rreth 3500 punonjës nga të cilët rreth 1800 shqiptarë, duke transformuar jo vetëm relievin ku ka shkelur por edhe gjithë situatën sociale në zonat që përshkohen nga punimet.
Me përurimin e njërit tunel, pritet që së shpejti, brenda qershorit, të bëhet edhe përurimi i rrugës që ka një gjatësi rreth 170 kilometra, nga Durrësi deri në Morinë.
Rruga do të mundësojë një lidhje të shpejtë mes Prishtinës dhe brigjeve shqiptare për më pak se 3-orë duke hapur horizonte të paimagjinuara më parë për zhvillimin ekonomik, turizmin, tregëtinë, lëvizjen e lirë dhe krijimin e një korridori strategjik rajonal.
Greqia, fqinji jugor i Shqipërisë ka rreth 10 vite që kryen punime për ndërtimin e korridorit Egnatia, Selanik-Janinë-Igumenitsa (e gjatë rreth 250 km) që ngjason në gjatësi dhe si projekt me korridorin Durrës-Morinë dhe është ende larg përfundimit të punimeve.

Ministri kosovar Limaj deklaroi për ceremoninë e pritur se punimet e Korridorit Durrës-Kukës, janë historike për shqiptarët e dy trojeve. Kjo është një vepër me rëndësi historike për të gjithë shqiptarët në të dy anët e kufirit tha ai.
Ai dhe kryeministri Thaçi qenë të ftuar në ceremoninë për përfundimin e tunelit në segmentin Rrëshen-Kalimash.
Limaj u shpreh se tuneli është simbol i rrënimit të pengesave mes dy vendeve dhe shënon kthimin e fillimit të qarkullimit normal mes shqiptarëve.
Delegacioni kosovar i kryesuar nga kryeministri Hashim Thaçi që morri pjesë në ceremoni, theksoi gjithashtu se ky moment historik shënoi veç të tjerave edhe hapjen e korridorit drejt një porti të Kosovës.
Kryeministri Thaçi: Tashmë malet s’na ndajnë dot më! Kryeministri i Kosovës, Hashim Thaçi e ka cilësuar rrugën Durrës-Kukës si një simbol të paqes dhe begatisë së shqiptarëve por edhe të gjithë popujve të rajonit. “Sot është një ditë e madhe për të gjithë shqiptarët kudo që jetojnë. Sot është një ditë e madhe edhe për mua personalisht, sepse ekziston një lidhje mes këtij rrugëtimi dhe lirisë së Kosovës. Janë të shumta e të pallogaritshme rastet kur me bashkëluftëtarët e mi, me orë të tëra e kemi bërë këtë rrugë për lirinë e vendit dhe sot Tirana e Prishtina jane si kurrë më parë pranë njera tjetrës dhe do afrohen dhe më tepër në të ardhmen”, u shpreh Thaçi pasi u takua me kryeministrin Berisha në mes të tunelit. “Pa dyshim, element qendror i kësaj afërsie shpirtërore, fizike dhe materiale është liria dhe pavarësia e Kosovës, është shteti i Kosovës. Pavarësia e Kosovës njeh nëpërmjet kësaj rruge dimensionin e plotë të afrimit. Kemi qenë të ndarë në shekuj, por kurrë nuk kemi qenë larg njeri-tjetrit dhe gjithmonë kemi sakrifikuar për t’u afruar”, deklaroi kryeministri i Kosovës. Ai falenderoi dhe kryeministrin Berisha, të cilin e përgëzoi për punën e bërë në ndërtimin e kësaj vepre historike. “Përveç dëshirave e ëndrrave për integrimin, kjo rrugë do t’i japë zhvillim të dyanshëm vendeve tona. Kjo është autostrada e shpresës, kjo është historia jonë, kjo është rruga e integrimeve, kjo është rruga e shek XXI, kjo është rruga e paqes, stabilitetit dhe zhvillimit në rajon”, përfundoi Thaçi.
Berisha: Tuneli bashkoi një komb. “Dëshiroj t’u përshëndes të gjithëve përzemërsisht dhe të ndaj me ju gëzimin e madh të shndërrimit sot në këtë moment të një ëndrre gjithshqiptare në një realitet. Sot ne përjetuam këtu realizimin e njërës prej ëndrrave më të bukura, përjetuam shembjen jo të një muri por të një mali, përjetuam shembjen jo të një muri por të pamundësisë. Sot ne inaguruam sëbashku me kryeministrin Thaçi, tunelin e Kalimashit, një nga kryeveprat në fushën e ndërtimit në Evropë dhe më gjerë”, theksoi Berisha para qindra të pranishmëve. “Ky është tuneli i bashkimit të kombit. Sot ne vendosëm se nuk ka asgjë që mund ta ndajë jo vetëm shpirtërisht por as fizikisht këtë komb. Sot ne inaguruam tunelin që bashkon jo vetëm shqiptarët por bashkuam tunelin që me shërbimet që ofron bashkon më shumë shqiptarët me kombe të tjera të rajonit. Sot ne inaguruam tunelin i cili do bëjë që brigjet e Shqipërisë, portet e saj, t’u shërbejne jo vetëm shqiptarëve por t’u shërbejnë të gjithë kombeve të rajonit”, nënvizoi Berisha. Kreu i qeverisë nuk ngurroi të flasë as për akuzat se rruga ka kushtuar shumë, duke thënë se vlera e kësaj vepre është shumë herë me e madhe se milionat a harxhuara për të. ”Tuneli është një vepër e kushtueshme, por dua të theksoj se për një komb, çmimi i kohës është çmimi i të gjitha çmimeve, ndaj dhe ky tunel kushton sot shumë më pak se sa koha e kalimtarëve që do kalojnë nëpër të gjatë një viti të vetëm. Tuneli ka qenë i vështirë dhe i kushtueshëm por çmimi i tij është qindra herë më i vogël se vlera e tij morale”, vijoi Berisha, i cili e mbylli fjalën me premtimin: “Nuk do lë asgjë pa bërë në mënyrë që shiptarëve t’ua japim Shqipërinë në pëllëmbë të dorës”.
Ndërtimi i tunelit, reagon PS-ja: Partia Socialiste nëpërmjet kryetarit të PS-së së Tiranës, Besnik Bare ka denoncuar shpenzimin ekstra të përdorur për rrugën Rrëshen-Kalimash. Sipas tij, me 600 milionë eurot e shpenzuara tepër për këtë rrugë, mund të ndërtoheshin qindra vepra të tjera të nevojshme për vendin. “Kjo rrugë në një vend normal të BE-së do të kushtonte vetëm 418 milionë euro, në Shqipërine tonë kjo kushton më shumë se 1 miliardë euro. Shpenzimi ekstra është 600 milionë euro, me këtë diferencë mund të ndërtoheshin në Shqipërinë tonë 1450 shkolla si edhe 145 spitale që t’u shërbenin të gjithë shqiptarëve”, u shpreh Bare.
Hapja e tunelit të Kalimashit u ndoq me emocione dhe vëmendje edhe nga pjesa tjetër e shqiptarëve, e atyre që jetojnë në Maqedoni. Përfaqësuesit e tyre e konsiderojnë përurimin e kësaj vepre, një ngjarje të përmasave historike për zhvillimet integruese jo vetëm të shqiptarëve, por të gjithë rajonit. “Sot po vazhdon proçesi i të bërit një komb. I unifikimit kombëtar. Dhe shqiptarët anembanë në Mal të Zi, në Çamëri, në Maqedoni, në Luginën e Preshevës, në Shqipëri dhe Kosovë, festojnë këtë mrekulli”, u shpreh Artan Grubi, kryetar i lëvizjes “Zgjohu”, në Shkup. “Eshtë një investim shumë i rëndësishëm i parë në disa dimensione. Në pikëpamjen ekonomike do të ndihmojë qeverinë e Kosovës të eliminojë vështirësitë në rimëkëmbjen e ekonomisë kombëtare, në dimensionin gjeopolitik do të ndihmojë Kosovën dhe Shqipërinë që të integrohen”, u shpreh zëdhënësi i DR-së, Fexhri Selami. “Eshtë një kontribut jo vetëm i integrimit shqiptar, por edhe ndaj integrimit rajonal. Ato rrugë drejt bregdetit shqiptar, nuk do t’i shfrytezojnë vetëm shqiptarët, por të gjithë qytetarët e rajonit. Eshtë edhe një mundësi që t’i heqim paragjykimet që për vite me radhë ekzistojnë në Ballkan”, është shprehur Teuta Arifi, deputete e BDI-së. PDSH, përmes një deklarate për shtyp ka thënë se kjo rrugë duhet t’i mësojë qeverisë së Shkupit se si lidhen shtetet dhe t’i japë fund politikave të saj izolacioniste.





Mare nga gazeta Libertas.

"Rruga Durrës-Kukës- Morinë, një projekt ky i qeverisë shqiptare, është vepra më e madhe inxhinierike në historinë e Shqipërisë".
Me behet qejfi shume per kete veper dhe dua qe shume shpejt te realizohet shteti i vetem shqiptar (Shqiperia plus Kosova).
Dua te shtoj diçka, jo nostalgjike, por reale. Te mos minimizojme vepra te tilla si Hidrocentralet etj te kryera me pare nga shqiptaret.