Hyn në fuqi ligji Antimafia, gati sekuestrimi i pasurive

Hyn në fuqi ligji Antimafia, gati sekuestrimi i pasurive


Emirjon Senja | 24/01/2010 |




Ligji parashikon sekuestrimin e pasurive që nuk u është deklaruar burimi. Sekuestrimi është i pakthyeshëm edhe nëse gjykata vendos në favor të të dëmtuarit.



TIRANË- Duke filluar nga sot, pasuritë mbi të cilat do të këtë dyshime se janë vendosur në mënyrë të jashtëligjshme do të sekuestrohen. I miratuar në Kuvend vetëm me votat e maxhorancës, dhe shumë i kundërshtuar nga grupet e interesit, ligji antimafia shënon sot ditën e parë të fillimit të zbatueshmërisë së tij.


Sipas dispozitave të parashikuara në ligj, kushdo që ka një pasuri të luajtshme apo të paluajtshme, pavarësisht vlerës apo periudhës në të cilën është krijuar, është i detyruar që të vërtetojë prejardhjen e saj. Nëse kjo nuk ndodh, organet hetimore gezojnë të drejtën që duke u bazuar mbi indicie të kërkojnë sekuestrimin e saj. Që në fillimet e hartimit të një ligji të tillë, kjo formë është parë si rruga më e mirë për t'i prerë burimet e financimit krimit të organizuar.
Në fakt, për vetë mënyrën se si parashikohet që ligji të zbatohet në terren, maxhoranca në pushtet hasi në kundërshtimin e përfaqësuesve të biznesit, avokatëve por edhe të shoqërisë civile. Gjatë reagimeve të tyre, këta të fundit nuk kanë përjashtuar mundësinë e përdorimit të tij për goditje selektive. Nisur nga kjo, ata e kanë parë të domosdoshme nxjerrjen e akteve të tjera nënligjore të cilat të përcaktojnë qartë zbatimin e tij në terren nga organet hetimore.


Objekt i ligjit "Për parandalimin dhe goditjen e krimit të organizuar", janë personat që kanë një standard jetese, të cilin nuk e justifikojnë të ardhurat që ai ka deklaruar. Ky është treguesi i parë që i bën organet përgjegjëse të nisin hetimin duke parashikuar edhe sekuestrimin e pasurisë nëse ka të dhëna që personi e ka përfituar atë në rrugë të jashtëligjshme. Në këtë mënyrë, ligji parashikon konfiskimin e pasurisë në rastet kur dyshohet për pjesëmarrje në organizata kriminale ose në grupe te strukturuara kriminale; pjesëmarrje në organizata terroriste ose në banda të armatosura; kryerjen e veprave të tjera për qëllime terroriste apo kryerjen e krimeve me qëllim fitimin e pasurive të paligjshme. Të gjitha krimet e mësipërme janë të parashikuara në disa nene të Kodit Penal.


Shqetësimet e grupeve të interesit shfaqen më dukshëm për sa i përket asaj ç'ka përcaktohet në pikën 3 të nenit 29. Sipas asaj çka parashikohet në këtë pikë, prona konfiskohet në mënyrë të pakthyeshme. Pra, bazuar mbi indicie, organet hetimore mund të sekuestrojnë një pronë e cila nuk i kthehet më pronarit edhe nëse gjykata vendos në favor të të dëmtuarit. Në këtë rast shteti merr përsipër zhdëmtimin e pronarit.
Në rastet kur dikush dyshohet se kryen veprimtari kriminale, organet hetimore verifikojnë nëse ai është zotërues i një autorizimi, licence, apo i një të drejte tjetër që lejon ushtrimin e një veprimtarie ekonomike. Në këtë mënyrë verifikohet nese personi në fjalë përfiton të ardhura apo financime nga kjo veprimtari apo edhe nga shteti, si një rrugë për të parë nëse të ardhurat e tij janë ose jo të ligjshme.


Por, verifikimet nuk përfundojnë vetëm tek personi i dyshuar. Sipas dispozitave ligjore, pjesë e hetimit janë edhe të afërmit, si bashkëshorti apo bashkëshortja, fëmijët, vellezërit, prindërit, etj., duke shkuar edhe deri tek nipërit apo vjehrri dhe vjehrra.



Tatohen të ardhurat e paligjshme
TIRANË- Krahas sekuestrimit të pasurisë, legjislacioni shqiptar ka njohur më parë edhe forma tatimi mbi pasuritë që janë vënë në mënyrë të jashtëligjshme. Ligji "Për procedurat tatimore" thekson se pjesë e tatimit do të jenë edhe pasuritë e personave që e kanë përfituar atë duke thyer ligjin. Madje, ligji parashikon vjeljen e tatimit edhe për periudhat të cilat personi ka gëzuar frutet e saj.


"Detyrimi tatimor lind edhe kur personi realizon të ardhura, kryen pagesa në formë të jashtëligjshme apo bëhet zotërues i një sendi në forma të jashtëligjshme. Kur personi bëhet pronar i një sendi në forma të jashtëligjshme, ky detyrim përllogaritet për të gjithë periudhen në të cilën personi ka gëzuar frytet e asaj pasurie", - citohet në pikën 1, neni 6 e ligjit.
Është pikërisht kjo pikë të cilës ministri i Financave Ridvan Bode, iu referuar dy ditë më parë kur tha se, legjislacioni shqiptar njeh forma të taksimit edhe të të ardhurave të paligjshme. "Në kuadrin fiskal në të gjithë botën dhe atë shqiptare ekziston detyrimi për të paguar taksa edhe nga veprime të jashtëligjshme. Nuk bëhet fjalë për amnisti me marrjen e kësaj mase", - tha Bode.