Kompensimi i pronarëve, rregullat e reja

Kompensimi i pronarëve, rregullat e reja
E.Hoxha | 10/06/2009


Qeveria ka miratuar rregullat dhe kriteret e reja për shpërndarjen e fondit të kompensimit financiar për ish-pronarët. Në vendimin e Këshillit të Ministrave, të botuar dje në fletoren zyrtare përcaktohet qartë radha për shpërndajren e fondit të vënë në dispozicion në buxhet për këtë vit.


Në vendim thuhet se subjektet e shpronësuar, prona e të cilëve është njohur e gjitha për kompensim do të kompensohet sipas radhës kronologjike, të përcaktuar nga numri dhe data e vendimit, vetëm në rastin kur nuk kanë përfituar nga fondet e mëparshme, nuk kanë përfituar kthim fizik të pjesshëm të pronës me çdo vendim për atë subjekt, nga e drejta e parablerjes dhe nga zbatimi i ligjit 7501.


"Në rastin e vendimeve, të cilat janë ndryshuar pjesërisht, për efekt klasifikimi do të merret numri dhe data e vendimit bazë, që është më i hershëm në radhë kronologjike për njohjen, kthimin dhe kompensimin e asaj prone", citohet në vendimin e qeverisë.
Procesi i regjistrimit dhe pranimit të kërkesave për kompensim do të nisë nga 13 qershori dhe do të zgjasë 30 ditë.


Sipas vendimit, Agjencia e Kthimit dhe Kompensimit të Pronave do të përjashtojë menjëherë nga procedurat e kompensimit të gjithë ish-pronarët që paraqesin të dhëna të rreme, ose që fshehin ato, si dhe i ngarkon ato me përgjegjësi penale.


Qeveria në buxhetin e vitit 2009 ka përcaktuar një fond prej 600 milionë lekësh, ose rreth 6 milionë dollarë për kompensimin financiar të kësaj shtrese të shoqërisë.


Gjithashtu zyrtarë të lartë të qeverisë kanë deklaruar se 10 për qind e të ardhurave nga privatizimet e shoqërive të zotëruara nga shteti do të shkojnë për kompensimin e tyre dhe dëmshpërblimin e ish-të përndjekurve politikë. Por deri tani nuk është bërë publik fondi dhe formula e ndarjes së tij për këto dy grupe.


Kompensimi


Kompensimi financiar, sipas vendimit, do të bëhet vetëm për sipërfaqet truall deri në 200 metra katrorë, të caktuar për kompensim, në bazë të çmimit të përcaktuar në hartën e vlerës së miratuar, sipas vendndodhjes së pronës.


Të gjithë ish-pronarët të cilët kanë depozituar kërkesat e tyre për kompensim financiar në vitet 2006 deri në vitin 2008 dhe që vërtetojnë kryerjen e pagesës nuk do të paguajnë tarifën e aplikimit për vitin 2009.


Gjithashtu në vendim janë përfshirë edhe formularët tip, të cilët duhet të plotësojnë dhe dorëzojnë ish-pronarët që kërkojnë kompensim nga fondi i parashikuar për to për vitin 2009.


Formulari 1 do të plotësohet nga të gjithë subjektet e shpronësuar, të cilët kërkojnë kompensimin e pronës së tyre në të holla, sipas kritereve të përcaktuara me vendim qeverie. Ndërsa formulari 2 do të jetë për personat me prokurë, të cilët paraqesin kërkesën për kompesim financiar.


Subjekti duhet të plotësojë dhe të paraqesë pranë zyrës së AKKP-së në qendër, dokumentacinin e mëposhtëm:


a.Kërkesën për kompensim në të holla, sipas formularit 1, që i bashkëlidhet këtij vendimi.
b.Deklaratën për pranimin e kritereve për kompensim, sipas vendimit përkatës të Këshillit të Ministrave, dhe kushteve të tjera, që lidhen me kriteret, sipas formularit 2, që i bashkëlidhet këtij vendimi.


c.Vendimin e komisionit të Kthimit dhe Kompensimit të Pronave ose të Agjencisë së Kthimit dhe Kompensimit të Pronave, për njohjen dhe kompensimin e pronës, së bashku me planvendosjen përkatëse, të njehsuara nga institucioni ku ato janë të arkivuara.
d.Dëshminë e trashëgimisë;


e.Prokurën e posaçme, të nënshkruar nga të gjithë trashëgimtarët e ligjshëm, ku si tagër i nevojshëm të jetë edhe e drejta për të tërhequr vlerën financiare, në emër të subjektit të shpronësuar;
f.Fotokopjen e noterizuar të dokumentit të identifikimit (letërnjofim apo pasaportë) të përfaqësuesit të pajisur me prokurë;
g.Dokument që vërteton vendbanimin, më 19.7.1991, të subjektit të shpronësuar;
h.Mandatpagesën.


Dokumentet që duhet të paraqesin ish-pronarët që kanë aplikuar në vitin 2008:
-Kërkesën për kompensim financiar, sipas formularit 1
-Deklaratën për pranimin e kritereve për kompensim, sipas vendimit të këshillit të Ministrave, dhe të kushteve të tjera, që lidhen me kriteret sipas formularit 2


-Dëshminë e trashëgimisë, kur në dëshminë e paraqitur në vitin 2008 ka ndryshime të trashëgimtarëve të ligjshëm të subjektit të shpronësuar, sipas radhës së trashëgimtarëve, të përcaktuar në Kodin Civil.


-Prokurën e posaçme, nëse ajo e paraqitur në vitin 2008, ka kufizime në kohë për tagrin e tërheqjes së shumës në të holla apo kur rrethi i trashëgimtarëve të subjektit të shpronësuar ka ndryshuar


-Dokumentin që vërteton vendbanimin më datë 19.7.1991, të subjektit të shptonësuar, për personat që nuk kanë vërtetime e SAMT-ve në dosje.




Mare nga gazeta Shekulli.