Deklaratë mbi sjelljen e organeve shtetërore të IRJM

.....Akoma edhe sot në mënyrë sistematike shqiptarë nga Shqipëria dhe Kosova që udhëtojnë në Maqedoni ndalohen dhe keqtrajtohen nga strukturat e këtij shteti. Rasti më i fundit ishte ai i ndalimit nga forcat e sigurisë maqedonase të udhëheqësit të Lëvizjes VETËVENDOSJE!, Albin Kurti.....

RRJETI I ORGANIZATAVE SHQIPTARE (DEGA TIRANË)
DEKLARATË

Vazhdimisht shteti maqedonas jep prova se është një shtet kundërshqiptar. Tashmë që nëpërkëmbja e të drejtave kushtetuese të qytetarëve me kombësi shqiptare (ndalimi i përdorimit të gjuhës shqipe dhe të flamurit kombëtar ndër tës tjera) është bërë diçka e zakontë, shteti maqedonas kërkon të fshijë apo të përvetësojë elementët e kulturës dhe trashëgimisë shqiptare në këtë vend, sikurse e dëshmojnë planet për ndërtimin e një kishe ortodokse në vendin ku ndodhej shtëpia e Nënë Terezës.
Qytetarët me kombësi shqiptare të I.R.J.M-së nuk janë të vetmit viktima të politikës kundërshqiptare të këtij shteti. Struktura të këtij shteti kanë treguar një sjellje armiqësore ndaj mbarë shqiptarëve në Ballkan. Akoma shteti maqedonas nuk ka dhënë llogari për shumë qytetarë të Shqipërisë që janë vrarë në kufirin midis dy vende nga ushtria maqedonase, pa asnjë shkak për këtë masë të skajshme. Gjithashtu të gjithë e mbajnë mend trajtimin çnjerëzor që u bë refugjatëve të luftës nga Kosova në vitin 1999 në kampet e Maqedonisë. Kjo në kundërshtim të plotë me konventat ndërkombëtare që rregullojnë sjelljen e shteteve në të tilla raste dhe mbi të gjitha në kundërshtim me dëshirën e qytetarëve shqiptarë të I.R.J.M-së për të ndihmuar vëllezërit e tyre të dëbuar me dhunë nga kriminelët serbë.
Akoma edhe sot në mënyrë sistematike shqiptarë nga Shqipëria dhe Kosova që udhëtojnë në Maqedoni ndalohen dhe keqtrajtohen nga strukturat e këtij shteti. Rasti më i fundit ishte ai i ndalimit nga forcat e sigurisë maqedonase të udhëheqësit të Lëvizjes VETËVENDOSJE!, Albin Kurti, në kufirin midis Kosovës dhe I.R.J.M-së, më datë 5 maj 2009 dhe mbajtja e tij disa orë i arrestuar, gjoja për arsye sigurie. Kurti i cili do të merrte pjesë në një festim të organizatës Zgjohu! në Shkup, ka udhëtuar vazhdimisht në këtë shtet pa lënë kurrëë shkak që të justifikonte ndalimin e tij. Një rast i ngjashëm ka ndodhur disa kohë më parë edhe me kryetarin e Klubit Kombëtar, Lizandër Saraçi, i cili po udhëtonte për një vizitë private në I.R.J.M, por u ndalua dhe u keqtrajtua nga policia kufitare maqedonase pa asnjë shkak, por vetëm se mbante veshur një bluzë me flamurin shqiptar! Ndalimi dhe presioni i vazhdueshëm që shteti maqedonas i bën të gjithë atyre që ngrenë zërin dhe kerkojnë të ndërgjegjësojnë shqiptarët për të drejtat e tyre, tregon qartë se ata e kanë kuptuar se blerja me poste e politikanëve shqiptarë atje, nuk mjafton për t’i përgjumur shqiptarët dhe se ata i tremben bashkëpunimit mbarëshqiptar.
Rrjetit të Organizatave Shqiptare për këtë sjellje armiqësore të strukturave shtetërore ndaj shqiptarëve dhe bëjmë thirrje që t’i jepet fund asaj. Ne marrim shkas nga ky rast që t’u tërheqim vëmendjen institucioneve të Shqipërisë që, përtej retorikës për marrëdhënie të mira dypalëshe me I.R.J.M., të respektojnë Kushtetutën e Republikës së Shqipërisë dhe të mbrojnë interesat qytetarëve dhe të bashkëkombasve të tjerë që janë dhunuar në të drejtat e tyre nga shteti maqedonas. Gjithashtu gjejmë rastin që t’u bëjmë thirrje faktorëve politikë të shqiptarëve në I.R.J.M. që tu japin fund grindjeve për poste dhe të përqëndrohen për të mbrojtur pa hezitim jo vetëm identitetin dhe interesat e tyre kombëtare, por edhe të drejtat e të gjithë shqiptarëve kur ato cenohen nga strukturat shtetërore të Maqedonisë.
Tiranë, 6 maj 2009