Kryesia e PS vendos: Bojkot të kushtëzuar Kuvendit

Kryesia e PS vendos: Bojkot të kushtëzuar Kuvendit

Nga Tema

Partia Socialiste nuk do të shkojë në parlament, duke i deklaruar kështu bojkot Kuvendit të ri të Shqipërisë, i cili do të mblidhet në seancën e parë, të hënën, 7 shtator. Kryesia e PS ka vendosur mbrëmë që t’i delegojë grupit parlamentar të drejtën e vendimmarrjes për bojkotin, por i rekomandon që deputetët e PS të shkojnë në Kuvend, vetëm në rastin kur mazhoranca pranon të rinumërohen votat në tri qarqet e pretenduara nga PS, të kthehen në punë militantët e PS, të larguar nga administrata publike, dhe të kryhet hetim parlamentar për zgjedhjet e 28 qershorit, për parregullsitë e pretenduara nga opozita. Veçanërisht kushti i parë, që ka të bëjë me rinumërimin e votave, duket gati i pamundur për t’u plotësuar, pasi është një debat i konsumuar përgjatë muajit korrik. Nisur nga kjo, duket se bojkoti i PS ndaj Kuvendit të Shqipërisë, është thuajse i sigurt dhe në një afat të pacaktuar.
Menjëherë pas mbledhjes së Kryesisë, kryetari në detyrë i PS, Edi Rama, tha se grupi parlamentar i PS do të vendosë sot për pjesëmarrjen në Kuvend, pasi, sipas Ramës, është ai që ka fjalën e fundit. Rama tha se Kryesia vendosi që t’i përcjellë grupit një vendim, sipas të cilit, grupi i PS të jetë në marrëdhënie të kushtëzuara me parlamentin. PS do jetë pjesë e parlamentit, kur shumica e këtij të fundit të plotësojë kushtet që kanë të bëjnë me zgjedhjet dhe gjithë kuadrin e demokracisë dhe të garës demokratike në vendin tonë. Deklarata e Ramës lë të kuptohet se grupi parlamentar socialist do të vendosë sot të bojkotojë Kuvendin e Shqipërisë, në pritje të plotësimit të kushteve të vëna nga PS, që kanë të bëjë me rinumërimin në qarkun e Shkodrës, Tiranës dhe Beratit, kthimin e militantëve në administratën shtetërore, si dhe hetimin parlamentar për zgjedhjet e 28 qershorit.


Debati


Anëtarët e Kryesisë së PS kanë debatuar për disa orë për të marrë vendimin për bojkot ose jo të parlamentit, por debati nuk është përqendruar vetëm në këtë pikë. Një sërë çështjesh që kanë të bëjnë me betejën politike midis kryetarit në detyrë, Edi Rama, dhe kundërshtarëve të tij në këtë parti, të kryesuar nga Ben Blushi, janë trajtuar nëpërmjet një debati mjaft të ashpër për rreth tri orë e gjysmë në mbledhjen e djeshme të Kryesisë.
Sa i përket çështjes së bojkotit ndaj Kuvendit të Shqipërisë, që në nisje të mbledhjes, anëtari i Kryesisë, Ben Blushi, ka kërkuar që Kryesia të shprehet kundër bojkotit parlamentar. Më pas edhe anëtari tjetër i Kryesisë, Arben Malaj, i pozicionuar kundër Ramës, ka kërkuar gjithashtu që PS të shmangë bojkotin, por grupi parlamentar të shkojë në Kuvend duke vendosur një marrëdhënie të kushtëzuar me parlamentin, deri në plotësimin e kushteve të vëna nga opozita.
“PS duhet t’i thotë jo bojkotit dhe të kërkojë kushtëzim të axhendës së parlamentit me hetimin e zgjedhjeve. Duhet gjithashtu të vendosë kusht për të mos pranuar votimet me shumicë të cilësuar, që janë votime për reforma. Duhet të kushtëzohet me kërkesat e opozitës për hetim ndërkombëtar për vrasjen e deputetit Fatmir Xhindi, hetimet parlamentare për abuzimet me fondet, me administratën etj., të jenë prioritare në axhendën e parlamentit të ri”, - mësohet të jetë shprehur Malaj në mbledhjen e Kryesisë.
Pas mbledhjes së Kryesisë, Ben Blushi u shpreh se, “për fat të keq u vendos që PS të mos marrë pjesë në Kuvend për një afat të pacaktuar dhe për arsye të paqarta”. Blushi u shpreh se bojkoti nuk është në dobi të PS, por vetëm për interesa të Edi Ramës, i cili, sipas Blushit, kërkon të relativizojë humbjen në zgjedhjet e 28 qershorit, dhe bëhet fjalë për humbjen e Edi Ramës dhe jo vetëm atë të PS. “Bashkë me disa kolegë u shprehëm kundër bojkotit, por që të krijonim raport të kushtëzuar me qeverinë dhe parlamentin duke qenë brenda parlamentit. Duhet të jemi aty për të bërë betejën që i takon grupit parlamentar të PS. Unë i kërkova Edi Ramës të jetë i qartë dhe të shprehet për kushtet tona dhe për fat të keq ai nuk dinte të thoshte asgjë. Nuk e dinte. Por tha se kjo do t’i lihet nesër grupit parlamentar, por kjo s’mund të arrihet gjatë natës. Ne mendojmë se të gjitha ato që ne synojmë, qoftë rinumërim apo gjithçka tjetër, mund t’i arrijmë vetëm duke qenë në parlament. Por Edi Rama është kundër qëndrimit tonë, sepse do të relativizojë humbjen e tij, sepse e ka të vështirë ta pranojë atë”, - tha Blushi.
Sa i përket qëndrimit që Blushi dhe mbështetësit e tij në PS do të mbajnë përballë qëndrimit të Ramës dhe mbështetësve të tij për bojkot ndaj parlamentit, Blushi tha se do të reflektojë vendimin e Kryesisë për të marrë në kohën e duhur vendimin e duhur. “Do reflektoj vendimin e shumicës, sepse ende jam i paqartë, dhe shumica e Kryesisë janë të paqartë në vendimin për bojkot. Shumica e Kryesisë ishte e paqartë me atë që kërkon Edi Rama, pra bojkotin e Kuvendit. Shumë anëtarë të Kryesisë u shprehën hapur kundër bojkotit, ndërsa kishte të tjerë që këtë e thanë nën zë apo të tjerë që nuk folën”, - tha Blushi.