Bëhu baba, shpëton ushtrinë

Mjafton një “pakujdesi” e vogël, për t’i shpëtuar shërbimit ushtarak apo pagesës së shumës së caktuar me ligj. Të gjithë meshkujt e martuar, që janë nën presionin e përmbushjes së detyrimit ushtarak, mund të shmangin fare lehtë, 12ßmujorin e detyrueshëm, mjafton të bëhen baballarë. Për t’iu shmangur shkrepjes së pushkës, turneve të rojes nëpër kazerma, etj, apo edhe pagesës, do të duhet të heqin dorë vetëm nga planifikimi familjar. Pra, nëse e kishin menduar të ishin kryefamiljarë, pak më vonë, duhet të afrojnë datat. Hapësira e re ligjore, u jep favorin, që pritet të fillojë të diskutohet e më pas të miratohet në kuvend, bën që baballarët, që duhet të kryejnë shërbimin ushtarak, të kenë mundësi të kryejnë detyrimet e tyre familjare. Ligji i ri në fakt, do të jetë mjaft pozitiv, për ata prindër, të cilët nuk kanë mundësi të paguajnë shumën e kërkuar e për më tepër, do t’ju duhet të lënë punën, për të përmbushur detyrimin ligjor të kryerjes së shërbimit ushtarak. Kjo do të thoshte jo pak, vështirësi financiare për në familje të re, që veç prindërve ka edhe të paktën një fëmijë. Në ligjin që është në fuqi, i miratuar në vitin 2003, ndryshohet një nga pikat e nenit 12-të, që përcakton kriteret e mos thirrjes në shërbimin e detyrueshëm ushtarak aktiv dhe alternativ. Në këto kategori, hyn edhe shtetasi kryefamiljar i martuar dhe me një a më shumë fëmijë të mitur. Pika “c” e këtij neni, ul numrin e detyrueshëm të fëmijëve të mitur nga dy që ishte më përpara në një. Por, falë ligjit të ri mund të krijohet edhe një tjetër situatë entuziazmante tek ata që kanë filluar të kryejnë shërbimin ushtarak. Të gjithë ata persona, nga mosha 19 deri në 27 vjeç, që janë duke kryer shërbimin ushtarak dhe janë të martuar mund të kenë dy gëzime në një ditë. Teksa je duke pritur në repart, të kalojë edhe një ditë nga 12-muajt, e detyrueshëm, mbërrin lajmi se je bërë me djalë apo vajzë. Që, nga ky moment, mund ta lësh repartin, jo më për tu rikthyer sërish, por për të mos u dukur më aty, duke iu përkushtuar fëmijës. Pra, në bazë të ligjit të ri, në ndryshimin e bërë në nenin 14-të, ku përcaktohen kategoritë që përfitojnë lirim para kohe, rasti kur shtetasi kryefamiljar, i martuar bëhet me një ose më shumë fëmijë. Ndryshe nga rasti i thirrjes për të kryer shërbimin ushtarak, në ligjin e mëparshëm nuk është reduktuar vetëm numri i fëmijëve nga dy në një. Në kategoritë që liroheshin para kohe ishin vetëm rastet, kur personi paraqitej si i paaftë për vazhdimin e shërbimit me vendim të Komisionit Mjekësor të Spitalit Ushtarak, fatkeqësi familjare të rënda ose kur bashkëshortja bëhet invalid ose vdes dhe fëmijët mbeten pa përkujdesje. Rasti tretë ishte dhe ai kur personi pranohej student në shkollat e larta ushtarake ose në Akademinë e Policisë. Ligji që pritet të diskutohet ditët e ardhshme në kuvendit, e më pas të miratohet më datë 22 shtator do të jetë në fuqi deri më 31 dhjetor të vitit 2009. Në 2010-ën shërbimi ushtarak nuk do të jetë më i detyrueshëm, por përkundrazi do të ketë vetëm ushtarë profesionistë me pagesë

ilir saqellari
gazeta korrieri