Mozaik mbi risi dhe kuriozitete

Mozaik mbi risi dhe kuriozitete

2013, internetin do ta përdorin 2.2 miliardë persona në botë. Numri i shfrytëzuesve të internetit në botë deri në vitin 2013 do të arrijë deri në nivelin prej 2.2 miliardë persona. Lajmi bëhet i ditur nga Instituti për hulumtim “Forester”, me seli në Paris, i cili ka ndërmarrë një studim mbi nivelin e përhapjes së përdorimit të internetit nga popullata ndërkombëtare. Studimi bën me dije se nga numri i përgjithshëm i shfrytëzuesve, 43 për qind e tyre do të jenë nga Azia, ndërsa 17 për qind prej tyre do jenë nga Kina. Sipas të dhënave, numri i shfrytëzuesve të internetit në vitin 2008 ka qenë një miliard e gjysmë njerëz. “Edhe përkundër krizës botërore ekonomike, për çdo vit rritet numri i shfrytëzuesve në Internet”, deklaroi analisti Daniel Vigder, i cili parashikoi rritje prej 45 për qind të shfrytëzuesve prej vitit 2008 deri në vitin 2013. Ekspertët presin që të ndryshojë radhitja gjeografike e shfrytëzuesve edhe atë në Azi të ketë rritje prej 38 në 43 për qind, në Amerikën e Veriut rënie prej 17 në 14 për qind, në Evropë rënie prej 26 në 22 për qind, përderisa përqindja e shfrytëzuesve në Amerikën e Jugut dhe rajonet tjera pritet të mbetet i njëjtë. Ndërkaq, një studim i fundit ka bërë me dijeni se edhe përdorimi i internetit në vetvete ka problematikat e tij. Kështu, mësohet se 2 ndër 3 përdorues të internetit, futen në të vetëm për Messenger apo Facebook.
Menaxheri shkarkohet nga puna se e ka gruan pornostar. Scott Janke, një drejtues i administratës së Fort Myers, në Florida, nuk e ka tradhtuar gruan. As nuk ka pasur marrëdhënie me ndonjë prej bashkëpunëtoreve të tij. Jo, thjesht është martuar. Vetëm se ka zgjedhur një bashkëshorte me një punë shumë të veçantë. E prandaj është shkarkuar. Janke, menaxher i komunës së Fort Myers, qytezë e vogël me 6500 banorë në SHBA, është martuar vjet me gruan e jetës së tij. Megjithatë, detyra e tij si funksionar është hedhur menjëherë në erë. Shkaku është fakti që e shoqja, e cila quhet Anabela Mota, ka një punë si pornostar. E pasi ky lajm ka mbërritur në veshët e kryebashkiakut dhe të përbërësve të këshillit komunal, Jankes iu desh të linte punën. Ka pasur një mbledhjeje urgjente, në të cilën është marrë në shqyrtim vetëm çështja e Janke dhe ndërprerja e marrëdhënies së punës me të. “Fundja, ai nuk ka bërë asgjë ilegale, ka shtuar kryebashkiaku, por, përderisa kemi projekte të rëndësishëm në kantier, s’mund të lejojmë që asgjë të na shkojë keq”. Janke mund të ngushëllohet vetëm me faktin se paga e tij do të jetë e garantuar edhe për 6 muajt e ardhshëm. Gjithsesi, ai ka nisur biseda me avokatë, për të vlerësuar mundësinë nëse ia vlen të ngrihet padi. Një gjë, megjithatë, është e sigurt: asgjë nuk e ndaj nga Anabela Mota, e njohur në arenën e filmave për të rritur, si «Jazella Moore». “S’kemi arsye për t’u turpëruar. Tani dëshirojmë vetëm të qëndrojmë në paqe me tre fëmijët tanë”, ka deklaruar çifti.
Rrezatimi i diellit të mbron nga sëmundjet patologjike. Rrezet e diellit reduktojnë riskun për sëmundjet e zemrës, por edhe kancerin, diabetin e shumë sëmundje të tjera. Sipas një studimi të shkencëtarëve amerikanë, njerëzit që kanë mungesë të vitaminës D, e njohur ndryshe si vitamina diellore, janë dy herë më shumë të rrezikuar të vuajnë nga ataku kardiak. Këto rezultate janë arritur duke testuar evidencat e trupave në rritje. Rezultatet tregojnë se një nivel i mjaftueshëm i vitaminës, të cilën çdo njeri mund ta përftojë brenda 20 minutave në diell, është vendimtar për mbarëvajtjen e shëndetit. Rekomandimet aktuale mbi vitaminën janë bazuar në parandalimin e këtyre çrregullimeve, duke përdorur një sasi relativisht të vogël ushqimesh, ose duke pirë një herë në ditë një vitaminë dhe ndoshta dy herë në ditë për moshat e thyera. Vitamina prodhohet prej prekursorëve natyralë të trupit, si pasojë e ekspozimit të lëkurës në rrezet diellore ultraviolet B. Plazhistët kaukazianë mund të marrin 20,000 IUs në 20 minuta në diellin e pasdites. Ndërsa, një ekspozim më i gjatë në diell dëmton lëkurën. Njerëzit me lëkurë të errët kanë nevojë për 3/5 e kohës së ekspozimit në diell, për të përftuar sasinë e nevojshme të vitaminës. Rrezet e diellit interferojnë, duke shfaqur dritën ultraviolet.
Plakja e popullatës, Shangai urdhëron bërjen mbi 2 fëmijë. Qyteti me numrin më të madh të banorëve në Kinë, Shangai, u ka bërë thirrje çifteve që të lindin më shumë se dy fëmijë, për shkak të plakjes së shpejtë të popullatës. Është kjo hera e parë që zyrtarët kinezë inkurajojnë familje më të mëdha që nga politika “një fëmijë për familje”, e njoftuar në vitin 1979. Kryetari i Komisionit të qytetit për planifikim familjar, thotë se çiftet që vijnë nga familjet me një fëmije tani ju bëhet thirrje që të kenë dy fëmijë. Komisioni Kombëtar për Planifikimin, thotë se më shumë se treçereku i grave në Kinë duan dy apo më shumë fëmijë. Zyrtarët për planifikimin familjar dhe vullnetarë do të vizitojnë shtëpitë në mbarë Shangain për të kujtuar banorët se, nëse i plotësojnë kriteret, mund të kenë një fëmijë të dytë. Pushteti lokal thotë se do të japë këshillim lidhur me potencialin financiar dhe ndikimin emocional të të paturit dy fëmijë. Politika e Kinës për një fëmijë është më pak rigoroze sesa sugjerohet. Në qytete është e lejuar që të kesh dy fëmijë, nëse asnjë nga prindërit nuk ka vëlla apo motër. Në fshat mund të kesh dy fëmijë, nëse fëmija i parë është vajzë. Shangai ishte një prej qyteteve të para kineze, ku njerëzit filluan të pasurohen, kur Kina nisi programin e reformave ekonomike. Si rezultat, jetëgjatësia atje u rrit më me shpejtësi se në zona të tjera të vendit. Supozohet se deri në vitin 2020, një e treta e Shangait do të jetë e moshës mbi gjashtëdhjetëvjeçar.
Zbulimi, njerëzit njihen vetëm sa i sheh në sy. Për të njohur dike, mjafton ta shohësh atë nga sytë. Kërkuesit e Universitetit të Barcelonës kane zbuluar se vetëm me anë të syve mund të marrim informacionet e duhura. Studimi i publikuar në revistën “Computational Biology”, tregon se menjëherë pas syve, shikimi ynë përqendrohet te forma e gojës dhe më pas te hunda. “E dinim se në trurin tonë ka hapësira të vogla vizive për të njohur dike dhe për të marrë prej pamjes së tyre informacionet e duhura”, thotë Mathias Keil, pjesëmarrës në studim. Mjafton pak për të parë një imazh, dhe sytë janë gjëja e parë që shohim te personi tjetër.
Truri artificial, do arrijë brenda 10 vitesh. Në konferencën TED 2009, e cila zhvillohet në Oksford të Anglisë, dhe në të cilën diskutohet për hulumtimet biomedicinale, drejtori i projektit Blue Brain, Henry Markram, ka pohuar se truri shtesë (‘artificial’) është i realizueshëm, dhe ka shtuar madje se ai do të mund ta përfundojë atë deri në vitin 2020. Markram nuk flet përmendësh, pasi ai që më herët ka arritur të bëjë disa elemente biologjike të trurit, edhe pse shumë më të thjeshta. Zhvillimi i trurit të njeriut do të ishte i një rëndësie të veçantë për sëmundjet mentale dhe sëmundjet e trurit në përgjithësi. Sipas vlerësimeve të Organizatës Botërore të Shëndetësisë, rreth dy miliardë njerëz në botë vuajnë nga një sëmundje e trurit.
Angli, vdes veterani i fundit i Luftës së Parë Botërore. Veterani i fundit, që kishte luftuar në Luftën e Parë Botërore, britaniku Harry Patch, vdiq dje, në moshën 111-vjeçare, njoftoi azili ku jetonte. Patch ka luftuar në betejën e njohur të Passchendaeles (Belgjikë) më 1917, në të cilën humbën jetën më shumë se 70000 britanikë. I thirrur në moshën 18-vjeçare, ai u përfshi në divizionin e 7-të të këmbësorisë së lehtë të Dukës së Kornuellit. Ai Harry Patch është konsideruar si veterani i fundit që ka luftuar në Luftën e Parë Botërore. Gjatë luftës në Passchendaele, Harry Patch kishte shërbyer si mitraljer. Pas luftës, ai punoi si hidraulik, derisa doli në pension më 1961.

Astronomi amator zbulon kometën që godet Jupiterin. Një astronom amator australian, nga një fshat në veri të Kanberas, bëri dy ditë më parë një zbulim të rrallë që befasoi shkencëtarët e NASA. Programuesi 44-vjeçar i programeve kompjuterike, Anthony Wesley, arriti të fotografonte me teleskopin e tij 37 centimetra, që e ka montuar në kopshtin e shtëpisë së tij, imazhe në zonën e impaktit të një komete apo asteroidi me madhësinë e Tokës, që u përplas me Jupiterin. “U desh kohë që të kuptoja se një njollë e zezë që shfaqej përtej reve të Jupiterit në të vërtetë ishte vendi i një përplasjeje… i pari që shihet nga astronomët që prej kohës kur kometa Shoemaker-Levy 9 u përplas 15 vjet më parë me Jupiterin nga 16-22 korrik të vitit 1994″, shkruan Wesley.
Mbetet në dollap, i mbaron Oksigjeni, e shpëton policia. Policët gjermanë është dashur ta shpëtojnë një 20-vjeçar të dehur, i cili për t’u argëtuar e kishte mbyllur veten në një dollap valixhesh në një stacion treni, mirëpo më pastaj kishte filluar të ngulfatej nga mungesa e oksigjenit. Pasi kishte kaluar natën duke pirë me miqtë e tij, 20-vjeçari e kishte konsideruar si një ide zbavitëse që të mbyllej në dollapin e valixheve, ka njoftuar policia e qytetit Ludwigshafen. Mirëpo, qeshja ishte zhdukur kur atij kishte filluar t’i mungonte oksigjeni, ndërsa shokët e tij nuk kishin mundur ta hapnin dollapin. Kështu, është dashur të ndërhynte policia për ta hapur derën dhe për ta shpëtuar 20-vjeçarin nga vdekja.

Mare nga gazeta Libertas.