Policia, "embargo" ujit që vadit hashashin e Lazaratit

Policia, "embargo" ujit që vadit hashashin e Lazaratit
Shtohen postblloqet, pengojnë hyrjen e autoboteve në fshatPolicia
vë "embargo" për ujin e Lazaratit në periudhën e ujitjes së hashashit.
Aksioni më i fundit i policisë, pas dështimeve në korrjen dhe
shkatërrimin e parcelave të hashashit në fshatin Lazarat, lidhet me
bllokimin e ujit dhe plehut kimik që dërgohet në këtë fshat. Prej
ditësh postblloqe të shumta policore kanë nisur bllokimin e autoboteve,
që kanë si destinacion Lazaratin, ndërkohë që nuk është lejuar as
dërgimi i sasive të plehut kimik në këtë zonë. Burime nga Policia e
Gjirokastrës pohojnë se operacioni ka kohë që ka nisur, por këto ditë,
kur temperaturat janë shumë të larta, ka bërë që veprimet të
intensifikohen më shumë. Në këtë mënyrë po tentohen që të dëmtohen sa
më tepër bimët e kanabisit, të cilat në këtë muaj ndodhen në fazën e
fundit të rritjes dhe janë gati për t‘u korrur. Mësohet se në aksion
janë angazhuar forca të shumta policore, të cilët patrullojnë me tri
turne rrugën për në Lazarat.

Prej shumë vitesh Lazarati ka mbetur një nga vatrat më "të nxehta" për
sa i përket kultivimit të bimës narkotike kanabis sativa, duke u
rezistuar operacioneve të shumta policore. Nuk kanë qenë të pakta
rastet kur policia jo vetëm ka dështuar në kapjen e kultivuesve të
lëndës narkotike, por janë ndaluar të hyjnë brenda tij. Kur policia ka
mundur të depërtojë në këtë fshat, ka asgjësuar vetëm disa dhjetëra
bimë hashashi, sasi kjo e papërfillshme për fshatin që e kultivon në
masë. Thuajse çdo tentativë policore për të hyrë në fshatin rebel është
përballur me kundërshtimin e ashpër të banorëve, të cilët të armatosur
kanë qëlluar mbi efektivët e policisë, ndërsa vitet e fundit janë
shënuar edhe raste kur është sulmuar Komisariati dhe Drejtoria e
Policisë së Qarkut Gjirokastër nga banorët e acaruar. Kjo ka bërë që
Policia e Gjirokastrës ta vendosë "me pikatore" ujin dhe plehun kimik,
dy elemente të domosdoshme për rritjen dhe zhvillimin e bimëve të
kanabisit, të cilat nuk mund të gjenden në këtë fshat. Fshati Lazarat
vuan nga mungesa e ujit dhe banorët e tij janë të detyruar që ta marrin
atë me anë të autoboteve, shpeshherë duke e blerë me çmime të kripura.
Duke e shfrytëzuar këtë fakt, policia ka vendosur bllokimin në hyrje të
fshatit të të gjitha automjeteve që dërgojnë ujin atje. Hyrja e
fshatit, në lagjen Kordhocë, është pika e fundit deri në të cilën mund
të shkojë policia, ndërsa më sipër qarkullimi është i rrezikshëm për
efektivët me uniformë. Burime policore pohojnë se përgjatë akseve
rrugore Gjirokastër - Lazarat dhe Derviçan - Lazarat janë vendosur disa
postblloqe stacionarë, të cilët kontrollojnë automjetet që
transportojnë ujë dhe ndalojnë cilindo që tenton të shkojë drejt
Lazaratit. Po kështu, patrulla të lëvizshme policore kontrollojnë
përgjatë rrugës edhe transportimin e plehut kimik që ka për destinacion
fshatin Lazarat. Policia pohon më tej se ky aksion do të vazhdojë edhe
në javët në vazhdim deri në muajin gusht, kur është faza e fundit e
kultivimit të bimëve narkotike.

Mare nga gazeta Shqip.