Lushnje. Zjarr në banesën e kandidatit të PR-së

Zjarr në banesën e kandidatit të PR-së
KRISTAQ THANASI | 08/06/2009
LUSHNJE- Përfshihet nga flakët banesa e kandidatit të Partisë Republikane të Lushnjes, njëherësh mjek në spitalin e qytetit. Lajmin e konfirmojnë burime të policisë, sipas të cilave ngjarja ka ndodhur dje, kur në banesën e shtetasit Robinson Lipe nuk ndodhej njeri. Zjarri është parë nga komshinjtë, të cilët të alarmuar kanë njoftuar policinë, e cila ka mbërritur së bashku me zjarrfikëset. Falë punës së shpejtë u evitua përhapja e flakëve në pjesën tjetër të banesës. Pas shuarjes së zjarrit u bë edhe bilanci i dëmtimeve. Nga zjarri ishin djegur të gjitha sendet elektro-shtëpiake të ndodhura në dhomën që u përfshi nga flakët. Mendohet se zjarri është shkaktuar nga një shkëndijë elektrike. Hetimet e para të ekspertëve e përjashtojnë një zjarr të qëllimshëm, por policia gjithsesi pritet të dalë me një përfundim zyrtar për këtë ngjarje, nga e cila pati vetëm dëm materiale.


Mare nga gazeta Shekulli.