Lushnjës s’i del 1 gol, Partizani pret Kastriotin

Lushnjës s’i del 1 gol, Partizani pret Kastriotin

Lushnja - Partizani 1-0

Shënues: Sekseri 42′

Lushnja: Bejte, Ndoni (Bufasi 88′), Dhima, Xhafa, Korreshi, Sekseri, Topi (Canka 78′), Gjoni (Sulo 60′), Hasalla, K.Arbri, Bubeqi. Trajner: I.Gjyla.

Partizani: Shehi, Malota (Capa 85′), Tafaj, Pinari, Karabeci, Babamusta, Gjondeda, Bakalli, Çeka, Karapici (A.Dushi 76′), Begaj (Maho 83′). Trajner: Sh.Duro.

Gjyqtarë: A.Stratev, M.Kirovski, J.Kertevicko (Maqedoni)

Kartonë të verdhë: Koreshi, Topi, Dhima, Bubeqi, Dushi, Babamusta

“Radiografia”

1′‑ Karapici nga 18 metra gjuan, por mbi traversë.

2′‑ K.Arbri gjendet i vetëm përballë portës së mbrojtur nga Shehi, i cili bën mrekullinë, duke larguar topin.

10′‑ Tentativë e Sekserit nga 20 metra, mbi traversë.

13′‑ Çeka jep një asist për Karapicin, i vetëm me Bejten, por ky i fundit ka bërë mrekullinë.

23′‑ Karapici depërton mjaft mirë mes mbrojtjes lushnjare, por në Çastin e fundit Xhafa i ndërhyn.

26′‑ Koreshi pason për Gjonin, i cili godet mjaft mirë në hyrje të zonës, por Shehi fluturon, duke grushtuar topin.

30′‑ Gjoni kroson mjaft mirë nga e djathta, Hasalla provon me të majtën, por Shehu edhe një herë tjetër tregon klasin e tij.

33′‑ Arbri pason për Bubeqin, i cili i vetëm shënon, por anësori e anulon. Lushnja proteston.

40′‑ Bakalli pason për Tafajn, i cili në planzhon nuk arrin të shënojë.

42′‑ Sekseri ekzekuton në mënyrë perfekte një goditje dënimi nga 18 metra dhe topi përfundon në rrjetë. 1-0 për Lushnjën.

45′‑ Tani është radha e Partizanit që të bëjë një goditje dënimi, por pret Bejte.

51′‑ Sekseri nga 18 metra provon, por jashtë.

56′‑ Karapici pason shkurt për Babamustën fluturimthi, por Bejte grushton.

59′‑ Bega pason për Karapicin, i cili është i vetëm, por gjuan jashtë.

64′‑ Karabeci godet nga një distancë e largët, por Bejte edhe një herë tjetër bën mrekullinë.

66′‑ Karapici pason për Karabecin, i cili në sparkatë nuk arrin të shënojë.

69′‑ Sekseri godet me kokë, pret Shehi.

70′‑ Karabeci tenton sërish, por pret Bejte.

86′‑ Kros nga e majta, Ndoni gjuan me kokë, por mbi traversë.

89′‑ Bubeqi pason me kokë tek Canka, i cili me roveshatë humbet një rast të pastër për shënim.

Komenti

Ajo që ka ndodhur ditën e shtunë në Lushnjë do të mbahet mend si një nga sfidat më dramatike të historisë së futbollit lushnjar. Kjo për shkak se Lushnja e gjitha ka qenë në ankth për të gjithë takimin, teksa i duhej vetëm një gol për të shpëtuar rënien nga superliga, por ky gol nuk erdhi kurrë. Pa diskutim një largim që i ka prekur shumë lushnjarët, sepse kanë fituar, duke u barazuar me pikë me Partizanin, por që kapriçiot e kampionatit dhe sistemit mbi të cilën është ndërtuar ky kampionat nuk i kanë dhënë të drejtë. Fitorja minimale nuk ka shërbyer asgjë për vendësit dhe është shoqëruar me lot në sytë e të paktën 10 mijë lushnjarëve, të cilët po kështu kanë pasur shumë zemërim, gjë të cilën e kanë shprehur duke ofenduar dhe sulmuar në fund gjyqtarët e ndeshjes, por edhe FSHF-në, që sipas tyre, ishte shkaktari i këtij turpi, që u bë në kurriz të kësaj skuadre javë pas jave. Ndërsa Partizani, nga ana tjetër, ka vuajtur shumë, ashtu si në fakt ka bërë gjatë gjithë sezonit. Kanë mbetur me zemër në dorë të gjithë drejtuesit dhe lojtarët e skuadrës së kuqe deri në vërshëllimën e fundit të gjyqtarit maqedonas. Më pas ka festë në kampin e kuq dhe ata 300 tifozë që ishin në stadium, paçka se përplasja me tifozët e Lushnjës ka qenë evidente dhe e pashmangshme.

Ndeshja ka qenë e denjë për të dyja skuadrat. Një takim shumë emocionues në të gjitha drejtimet, brenda fushës, ku gjithçka ka qenë e fortë dhe me shumë raste, por edhe jashtë fushe, ku në stadium ankthi ka qenë i madh. “Perla” e Sekserit ka çuar në delir 10 mijë tifozët dhe Lushnja shpresoi. E gjitha pjesa e dytë ka një skenar, sulmon Lushnja dhe mbrohet Partizani, i cili nuk ka ditur të përfitojë në kundërsulm. Minutat shtesë janë një dramë më vete, një dramë që përfundon me lot për lushnjarët dhe gëzim për skuadrën e Partizanit, që tani do të luajë në “play-out” me Kastriotin më 30 maj.

Deklarojnë:

Ilir Gjyla, trajner i Lushnjës: “Ishte një ndeshje mirë nga ana jonë. Unë e kisha thënë që do të fitonim dhe kështu ndodhi, paçka se kjo nuk mjaftoi. Djemtë luajtëm mirë dhe mund të kishim shënuar edhe më shumë, nëse do të kishim qenë të qetë. Gjithsesi, unë e them sërish se kjo federatë supermashtruese bëri të veten dhe dënoi skuadra, si Lushnja, Partizani dhe Elbasani, që nuk e meritonin. Shikoni se si u shty analiza e takimit Shkumbini‑Bylis. Nëse do të humbisnim ne, Bylisit nuk do t’i hiqeshin pikët, në të kundërt, nëse ne fitonim 2-0, skuadrës së Bylisit do i hiqeshin pikët vetëm për të mos nxjerrë Partizanin. E përsëris, pra kjo federatë është e paturpshme dhe le të më gjobisin sërish nëse duan. Ata të mos mërziten se unë do të flas edhe për gjëra të tjera. Kishin sjellë sot një gjyqtar, që në pjesën e dytë veproi me keq sesa një gjyqtar shqiptar.”

Shpëtim Duro, trajner i Partizanit: “Jam i kënaqur me këtë rezultat, që na çon në “play-out”. Ishte një ndeshje e vështirë, sepse edhe Lushnja luajti shumë mirë. Më vjen keq që Lushnja doli, por unë i mbetem ende idesë se ky kampionat ka qenë fals në javët e fundit. Edhe sikur të mos kisha fituar, kështu do të përgjigjesha. Më vjen keq që me skuadra si ne ndodh kështu. Tani duhet të përgatitemi për “play-out”, ndërsa Lushnjës i uroj shumë suksese në të ardhmen.”

Të veçanta

‑ Në tribunën “VIP” nga Partizani ka qenë vetëm Bejkush Birçe.

‑ Gati 200 forca të ndërhyrjes së shpejtë kanë blinduar stadiumin “Ruzhdi Bizhuta”.

‑ Nuk kanë munguar incidentet dhe përplasjet me sende të forta mes tifozëve vendës dhe tifozëve miq, të marrë në mbrojtje në fund nga policia.

‑ Dekor i jashtëzakonshëm dhe rreth 10 mijë të pranishëm në stadium, ndërsa nga Partizani ishin rreth 300 tifozë.

‑ Në çastin e fundit trajneri Duro ka menduar të mos i japë mundësi Viktor Gjylës të luajë përballë ish-skuadrës së tij, duke pasur dyshimet e veta.

‑ Nuk kanë munguar thirrjet në kor kundër federatës.

» Historia e lushnjes!