Legalizohen 3605 banesa e shtesa pallatesh

TIRANË- Agjencia e Legalizimit dhe Urbanizimit të Ndërtimeve Informale ka miratuar dje dhe kaluar në legalizimin e 3351 ndërtimeve informale në Tiranë, Berat, Fier, Vlorë, Durrës, Elbasan, Shkodër, Lezhë dhe Dibër.

"Shekulli" nis sot botimin e të gjitha listave me emrat e fituesve, sipërfaqen e ndërtimit që do të legalizohet dhe numrin e kateve për secilin prej fituesve. Dosja përkatëse me të gjitha të dhënat e secilit prej vetëdeklaruesve që do të legalizohet është dërguar në Këshillin e Ministrave dhe është miratuar gjatë mbledhjes së djeshme.

Tashmë të gjithë personat që kanë emrin në listat e publikuara nga "Shekulli" duhet të paraqiten në zyrat e ALUIZNI-t për të kryer pagesën përkatëse që hap edhe rrugën e marrjes së tapisë përfundimtare.

Ndërkohë në mbledhjen e djeshme të qeverisë është miratuar, me propozim të ALUIZNI-t edhe legalizimi i shtesave të pallateve dhe ndërtimeve të tjera që janë kryer brenda vijës së verdhë përpara vitit 1993.

Bëhet fjalë për 254 ndërtime shtesa pallatesh pa leje të shpërndara në 123120 metra katrorë, për të cilat përfitojnë 579 familje. "Shekulli" nis botimin e plotë të këtyre listave për rrethet Tiranë, Elbasan, Durrës, Lezhë, Gjirokastër e Përmet. Pjesën më të madhe e zënë shtesat e pallateve në kryeqytet.

Shekulli | 07/05/2009