Antonio Kasano çmend italinë: "Në 11 vjet kam shkuar me 700 vajza

Nëse nuk do të kishte shënuar atë gol ndaj Interit në 1999-ën, me siguri do të kishte përfunduar si një kriminel ose shpërndarës droge. E pranon vetë ai, Antonio Kasano në librin autobiografik që sapo ka dalë në të gjitha libraritë e Italisë. Barezi tregon gjithë jetën e tij, duke filluar nga debutimi me Barin, kalimin tek Roma, kontradiktat e shumta me trajnerët e deri tek dashnoret e shumta që ka pasur gjatë kësaj kohe, sidomos kur luante në Spanjë te Real Madrid.

Trajnerët
Nga teknikët, i vetmi që iu “shpëton” kritikave të Kasanos është Fasheti, ish-trajner i Barit. “Fasheti është i vetmi, të cilit i kam qëndruar strikt. Spaletit (trajnerit aktual të Romës) i kam thënë se nuk jam si ata morrat që ke drejtuar tek Udineze. Roma është shtëpia ime dhe jo jotja. Ndërsa Kapelos i jam derdhur gjithë inat, sepse më nxori në nxehmje me Ronaldon përgjatë gjithë pjesës së dytë dhe pastaj nuk më aktivizoi. “Je një m..., ja çfarë je. Je më fals se vetë paratë”! Ndërsa Luixhi Del Nerit iu përpiva sepse nuk arrija të kuptoja asnjë fjalë nga ato që thoshte”, pohon Kasano në librin e tij.
Fillimet
Kasano tregon edhe popullaritetin që kishte që në fillim tek Bari edhe pse ishte vetëm një djalë 17-vjeçar. “Të gjithë më donin në skuadër. Luanim nëpër lagjet e Barit të Vjetër dhe vinim bast 10, 15, 20 mijë lireta për ekipin që fitonte. Natyrisht që unë merrja më shumë ngase isha edhe më i miri. Shpesh herë kishte edhe sirena ambulancash, të shtëna armësh dhe polici, por këto ishin pothuajse gjëra të zakonta. Bilanci që bëj tani, janë 17 vite të kaluara në futboll, nga ku 9 si milioner”, tregon Kasano. Ndërkohë që shkolla ishte edhe pjesa më negative e tij. Fenomeni barez tregon se e patën ngelur në klasë 6 herë dhe se kishte nota shpesh herë më të ulëtat në gjithë klasën.
Ushqimi dhe seksi
Por me të vetmet gjëra që Kasano pohon se nuk bënë shaka, janë ushqimi dhe dashnoret. Në libër një vend të veçantë zënë historitë e tij të shkurta të dashurisë, duke përmendur një numër të konsiderueshëm të femrave me të cilat ka shkuar përgjatë 11 viteve të fundit. “Kam pasur 4 të fejuara në 11 vjet, pak, por mos harrojmë këtu një numër nga 600-700 të femrave me të cilat kam shkuar të paktën një herë. Minimumi, 20 prej tyre vinin nga bota e spektaklit. Shpesh herë kam luajtur ndeshje shumë të bukura vetëm disa orë pasi kisha bërë seks. Mjaft të shikoni Roma-Juventus 4-0. Kisha shkuar me një nga të shumtat dashnore që kisha në atë periudhë në orën 6 të mëngjesit. Ndërsa në Madrid ishte akoma edhe më e thjeshtë, sepse ishim në një hotel, djem e vajza dhe mund të thërrisje për të kaluar natën kë të doje ti. Asokohe njihja një kamerier shumë besnik e djalë te Zoti. Detyra e tij ishte të më sillte 3 ose katër briosh, pasi kisha bërë seks. Ai më sillte brioshët deri tek dera, ndërsa unë shoqëroja dashnoren e radhës, duke bërë ndërrimin: ai merrte vajzën, ndërsa unë brioshët, e kështu për ditë e ditë me radhë”, tregon Kasano.
Cruzeiro de Rondonia, ekipi që nuk fiton prej 3 vitesh e 5 muajsh
Në Shqipëri pas një ndeshjeje të luajtur keq, bëhen kritika ndaj skuadrës, shpeshherë duke kërkuar edhe largimin e trajnerit. Por për fat të mirë, asnjë shqiptar nuk është tifoz i Cruzeiro de Rondonia, skuadrës braziliane të Porto Velho-s, e cila ka fituar për herë të fundit më 26 maj 2005, pra përpara tre vjetësh e pesë muajsh. Gjatë kësaj periudhe Cruzeiro ka zhvilluar 22 ndeshje zyrtare, duke barazuar katër dhe duke i humbur gjithë të tjerat. Ekipi ka shënuar 18 gola dhe ka pësuar mbi 70. Domingos Machado, i njohur më mirë me nofkën Lolo, është presidenti, trajneri dhe tifozi i vetëm i Cruzeiro de Rodonias dhe nuk zotëron burimet ekonomike për ta përmirësuar situatën, duke qenë se nuk ka para as për të paguar lojtarët dhe për të blerë uniforma të reja. Kështu që futbollistët e skuadrës janë të detyruar të bëjnë edhe punë të tjera për të jetuar. Qendërsulmuesi Jefferson punon polic trafiku, ndërsa zv/trajneri Cristiano është saldator dhe shkon në fushën e stërvitjes me biçikletë.
Francezët, evropianët me më shumë lojtarë në Champions
Francezët janë kontingjenti me numër më të lartë mes evropianëve në Ligën e Kampioneve në pesë vitet e fundit. Një gjë e tillë ka dalë në pah nga një studim i kryer nga UEFA. Nga kërkimi mësohet se në edicionin 2007-2008 pas francezëve (58) vinin spanjollët (53), italianët (52), portugezët (48), gjermanët (41) dhe turqit (36). Anglia është përfaqësuar vetëm nga 28 lojtarë pavarësisht se vjet shkuan në gjysmëfinalen e Championsit tri skuadra angleze. Në harkun pesëvjeçar në Champions kanë luajtur 325 francezë, 288 spanjollë dhe 253 italianë.
Mançester Junajtid synon Ksavi-n e Barcelonës
Ksavi, mesfushori organizator i Barcelonës, sipas asaj që bën të ditur gazeta angleze Daily Star, është objektivi i Mançester, i cili është gati të paguajë 20 milionë sterlina për të (24,3 milionë euro) pasi e konsideron si alternativën ideale të Paul Scholes, por edhe të Owen Hargreaves. Ky i fundit pikërisht dje mësoi se duhet të operohet për herë të dytë në gju. Një gjë që do t’ia bëjë të pamundur të vazhdojë të luajë në pjesën e mbetur të sezonit dhe që e vë në dyshim edhe karrierën e tij. Duke iu kthyer Ksavi-t, mesfushori ka një kontratë me Barcelonën deri më 2010-n.
Liverpuli, 425 mln euro borxhe, ikin lojtarët
Kriza financiare rrezikon ta shkatërrojë Liverpulin, i cili mund të detyrohet t’i shesë kampionët e tij për të larë borxhet. Bëhet fjalë për mbi 425 milionë euro. Sipas bankierit Keith Harris, që ka orkestruar blerjen e të kuqve nga ana e amerikanëve George Gillett dhe Tom Hicks, e vetmja rrugë shpëtimi është të merret 6 muaj shtyrje e afatit nga dy bankat kredidhënëse, Royal Bank of Scotland dhe Wachovia, të cilat janë gjithashtu në vështirësi të mëdha për shkak të krizës së kredive.
Inter, kthehen Adriano e Figo, në dyshim aktivizimi
Adriano është kthyer në stërvitje. Pas i ka kaluar gripi “perandori” është shfaqur në fushën stërvitore të Interit, ku kreu një seancë të veçantë, së bashku me Figon, i cili është duke u riaftësuar pas dëmtimit në kavilje. Lojtarët u stërvitën kryesisht në palestër dhe pak në fushë, me dhe pa top. Megjithatë, në kuadër të ndeshjes të së shtunës në mbrëmje në Palermo, zor se qendërsulmuesi brazilian do të jetë mes të grumbulluarve.

Marre nga: T.O