Mediu ministër Mjedisi, demokratët kundërshtojnë

Mediu ministër Mjedisi, demokratët kundërshtojnë


Shekulli Online | 05/09/2009



Fatmir Mediu do të jetë ministri i ri i Mjedisit. Ai do të kthehet sërish në qeveri, pas dorëheqjes së detyruar nga posti i Ministrisë së Mbrojtjes, si rezultat i tragjedisë së Gërdecit, ku humbën jetën 26 persona dhe u plagosen mbi 300 të tjerë.
Pikërisht për këtë ngjarje mjaft të rëndë, zyrtarë të lartë të Partisë Demokratike, për herë të parë, e kanë parë me rezerva përfshirjen e tij në kabinetin e ardhshëm qeveritar, duke e cilësuar të pamoralshëm rikthimin e tij në kabinetin qeveritar.
Burime nga PD-ja deklaruan për gazetën se një fakt i tillë i është përcjellë edhe vetë atij gjatë takimit të zhvilluar dje me Kryeministrin Sali Berisha. Por, vetë Mediu, pas takimit të zhvilluar me Berishën, nuk e ka vënë në dyshim përfaqësimin politik të tij.
"Fatmir Mediu është vetëm kryetar i republikanëve, deputet i republikanëve, dhe nuk mendoj që ndonjë njeri vë në dyshim përfaqësimin politik të Fatmir Mediut. Ne diskutuam me Kryeministrin për disa propozime konkrete, megjithatë do të mblidhet kryesia e PR-së që do të marrë qëndrimin e saj në raport me propozimet e Kryeministrit, kërkesat e PR-së dhe pastaj me vendimet e nevojshme që janë për përfaqësimin e të gjithë individëve",- tha Mediu.
Ndërkohë, pas një orë e gjysme mbledhje të kryesisë, të zhvilluar mbrëmë në ambientet e selisë, republikanët, pavarësisht rezervave të PD-së, votuan kandidaturën e Mediut, për drejtimin e Ministrisë së Mjedisit.
Burime nga kryesia e PR-së deklaruan mbrëmë për "Shekulli"-n se duke qenë se pozicioni i ministrit është politik, atëherë, sipas tyre, i takon kryetarit të partisë që të përfaqësojë këtë forcë politike në drejtimin e Ministrisë së Mjedisit.
Gjatë mbledhjes së kryesisë është rënë gjithashtu dakord për propozimin tjetër të Berishës, që PR-ja të ketë në qeveri edhe dy zëvendëskryeministra. Por, për këta të fundit, republikanët janë shprehur se nuk është vendosur ende se në cilat dikastere do të përfshihen, duke mbetur pjesë e negociatave të mëtejshme.
Formula e përfaqësimit të PR-së në qeveri është servirur dje nga kryetari i PD-së, Sali Berisha, gjatë takimit të zhvilluar me kryetarin e PR-së, Fatmir Mediu. Ndërsa partisë tjetër aleate me PD-në, që përfaqësohet po me një mandat deputeti në Kuvend, Partisë për Drejtësi dhe Integrim, do ti ofrohet post zv-ministri.

************

Qeveria e re, jashtë Ruli, Bode, Oketa, Nishani, Beja

Pasi është ndarë torta e pushtetit me Lëvizjen Socialiste për Integrim, kryeministri, Sali Berisha, po planifikon se si të ndajë ministritë e tjera mes demokratëve dhe aleatëve të koalicionit të tij.
Mësohet se Lulzim Basha, i cili nuk do jetë më ministër i Jashtëm, për shkak se këtë post do e marrë Ilir Meta, mund të shkojë te Ministria e Mbrojtjes.
Por mësohet se një tjetër lëvizje e rëndësishme do të jetë ajo në Ministrinë e Financave, e cila do të drejtohet nga Florion Mima. Ky i fundit u zgjodh deputet në qarkun e Tiranës, e deri më tani ka qenë zëvendësministër në këtë ministri.
Ridvan Bode, që ka drejtuar Financat për katër vite, do të ngelet pa post ministror. Shpesh gjatë mandatit që shkoi, Berisha pati përplasje me Boden në lidhje me çështje të ndjeshme si rritja e pagave, shpërblimet e fundvitit apo dhe rritja ekonomike dhe planifikimi i buxhetit.
Në tjetër i zhvendosur për shkak të marrëveshjes me LSI, ministri i Ekonomisë, Genc Ruli, do mbetet pa post ministror.
Në krye të Ministrisë së Brendshme do të vendoset nënkryetari i PD, Astrit Patozi. Ai do të spostojë nga detyra Bujar Nishanin, që shpesh kohëve të fundit nuk ishte në gjendje të kryente detyrën për shkak të problemeve shëndetësore.
Ndërsa republikanët, të cilët nuk do e kenë më Ministrinë e Shëndetësisë, do të marrin në dorë Ministrinë e Mjedisit. Në krye të kësaj ministrie do të vendoset Fatmir Mediu, që rikthehet në këtë mënyrë në kabinetin qeveritar. Kështu në qeveri do vijojnë të jenë dy ministrat që u zhveshën nga imuniteti për t'u hetuar për aferat më të rënda kriminale e korruptive në historinë politike shqiptare.
Në postin e ministrit të Arsimit pritet të rikthehet Genc Pollo, i cili ka shkrirë partinë e tij me atë të Berishës.
PBDNJ, e cila është në aleancë me Partinë Socialiste, do të ngelet jashtë qeverisjes, por një minoritar do të marrë ministrinë e tyre, atë të Punës, Çështjeve Sociale dhe Shanseve të Barabarta. Bëhet fjalë për Spiro Kserën, ish-prefekt i Gjirokastrës, që kandidoi për PD në këto zgjedhje.
Përveç Sokol Olldashit, që duket se do të ruajë postin e mëparshëm, edhe Majlinda Bregu do të vijojë të jetë ministre e Integrimit. Në krye të Ministrisë së Drejtësisë do të vijojë të qëndrojë sërish Enkelejd Alibeaj e po ashtu Jemin Gjana do të jetë ministër Bujqësie dhe për mandatin në vijim.
Me shumë gjasë, Ministria e Kulturës mund të shkojë për Partinë për Drejtësi e Integrim, që përfaqëson interesat e komunitetit çam.
LSI nga ana e saj ka përcaktuar tashmë emrat që do drejtojnë dikasteret që ka marrë me marrëveshje nga Berisha. Ilir Meta do marrë edhe postin e zëvendëskryeministrit, edhe atë të ministrit të Jashtëm, Petrit Vasili do të drejtojë Ministrinë e Shëndetësisë, e cila gjithmonë shkon si plaçkë lufte për aleatët, kurse Dritan Prifti, që parapriu marrëveshjen e paprecedent në Shqipëri, do t'i gëzohet Ministrisë së Ekonomisë dhe Energjitikës, fushë në të cilën ka njohje, por dhe një mal me akuza për abuzime.