Pedagogu, seks për provimin

• Pedagogu i infermierisë në Universitetin e Korçës është prangosur në një nga dhomat e një hoteli, ndërsa përdhunonte studenten e tij.

KORÇE/ JORGJETA GJANÇI

Skandali është zbardhur tashmë nga policia e Korçës, e cila bën të ditur se Robert Rado abuzoi e mbajti në presion psikologjik studenten J.S., në këmbim për t’i dhënë asaj provimin. Seksi me dhunë pedagog-studente është regjistruar në kamerat e instaluara më parë në dhomën e hotelit nga ana e policisë. Kjo e fundit, ka bashkëpunuar me 19-vjeçaren, e cila kishte kryer denoncimin pas kërkesave të vazhdueshme të profesorit të saj për të kryer marrëdhënie seksuale. “Provimi i sigurt”, është koduar operacioni i policisë, e cila tashmë disponon në cilësinë e provës, gjithë skemën skandaloze që është realizuar në një nga dhomat e hotelit që studentja kishte “zgjedhur”, për të kryer marrëdhënie seksuale me pedagogun e saj. Në kamera është regjistruar gjithçka. Në fillim është futur në dhomë vajza, e pas saj, pedagogu. “Profesor, u pendova. Ti je i martuar, ke grua dhe fëmijë. Edhe unë një ditë do të krijoj familjen time dhe do të më vijë turp nga kjo që mund të ndodhë sot”. Me këto fjalë i është drejtuar 19-vjeçarja profesorit, i cili për nga mosha ishte babai i saj, duke i kërkuar që të ktheheshin mbrapsht. Por më kot është munduar vajza të prekë sadopak ndërgjegjen e pedagogut për të lënë me kaq këtë histori. 46-vjeçari nuk është tërhequr megjithë lutjet e vajzës që të hiqte dorë nga dëshira e shfrenuar për seks. Në përgjigje të këtyre lutjeve dhe thirrjes për reflektim pedagogu e ka kërcënuar studenten e tij se nëse nuk kryenin marrëdhënie, ai nuk do t’ia jepte kurrë provimin. Më pas, duke parë këmbënguljen dhe pendesën e 19-vjeçares, ai e ka qëlluar me shpulla dhe më pas, forcërisht e ka detyruar të realizojë qëllimin për të cilin kishin ardhur. Pikërisht në këto momente ka ndërhyrë policia, që po e ndiqte nga kamerat e vëna më parë në dhomë gjithë skemën. Sipas policisë, Rado akuzohet për veprat penale “kryerje të marrëdhënieve seksuale duke shpërdoruar detyrën”, “shpërdorimit të detyrës” dhe “korrupsionit pasiv nga personat që ushtrojnë funksione publike”, vepra këto të parashikuara nga nenet 105, 248 dhe 259 të Kodit Penal. Në fakt policia e Korçës, ditën e arrestimit konfirmoi se pedagogu Rado u prangos pasi i kërkoi studentes 100 euro në këmbim të provimit. Por më pas është zbardhur gjithë skandali po nga policia, që e justifikoi konfirmimin e një dite më parë me faktin e ruajtjes së etikës për personat publikë, siç ishte edhe rasti i profesorit.


Vlorë, pedagogu u përgjua
VLORE - Policia e Vlorës ka mbajtur në përgjim 15 ditë pedagogun e letërsisë në universitetin “Ismail Qemali”. Pas denoncimit nga një studente e tij se ai kishte kërkuar 100 euro për ta kaluar në lëndën që ai jepte gjatë semestrit të dytë të këtij viti akademik, policia u vu në lëvizje. Blutë e kanë koduar operacionin të njëjtë me atë të Korçës, “Provimi i Sigurt” dhe kanë kryer mbrëmjen e së mërkurës arrestimin e 32-vjeçarit Enertin Dheskali. Ai është përgjuar duke folur me studenten, e madje edhe me të tjerë, por policia nuk bën të ditur detaje të bisedave telefonike. Ndërkaq, mësohet se pedagogu Dheskali nuk ka pranuar akuzat e policisë, “Shpërdorim të detyrës” dhe “Korrupsionit pasiv nga personat që ushtrojnë funksione publike”. Policia bëri të ditur se, 32-vjeçari u prangos sepse ka përfituar shuma të ndryshme lekësh nga studentët kundrejt kalimit në provimet e lëndës që ai jepte.

Gazeta panorama

Pedagogu: Policia na kapi duke pirë cigare

• Robert Rado, pedagogu i arrestuar nga policia tri ditë më parë në Korçë, ka mohuar përdorimin e dhunës, apo kryerjen e marrëdhënieve seksuale me studenten që e denoncoi.

KORÇE/ JORGJETA GJANÇI

“Kur hyri policia unë isha ulur në karrige dhe vajza ulur në tavolinë duke pirë cigare”, mësohet të ketë deklaruar pedagogu i Infermierisë së universitetit “Fan S.Noli”, përpara oficerëve të Policisë Gjyqësore. Këtë fakt e ka konfirmuar edhe avokati i tij mbrojtës, Robert Hyska. “Klienti im, - është shprehur ai, - nuk ka pranuar kryerjen e marrëdhënieve seksuale me studenten. Ai më ka pohuar se vajza e kishte ftuar për të pirë një kafe dhe pasi kishte pranuar, me një taksi të rastit shkuan në një lokal në periferi të qytetit”.
Bëhet e ditur se pedagogu Rado ka qenë në një gjendje të rëndë psikologjike dhe shëndetësore. Avokati ka pohuar se klienti i tij ka tri ditë pa marrë asnjë lloj ushqimi dhe gjatë mbrëmjes së të enjtes ka pësuar edhe një paralizë të ekstremiteteve të trupit. Kanë qenë punonjësit e policisë së paraburgimit, që menjëherë e kanë çuar në Urgjencën e Spitalit për ndihmë të kualifikuar mjekësore. Ndërkohë, familja e pedagogut ka hedhur dyshimin se policia ka tejkaluar kompetencat e saj dhe se ka përfituar nga papjekuria e vajzës për të stimuluar një show mediatik. Mësohet se Prokuroria e Korçës ka qenë paksa e tërhequr në hetimet rreth skandalit të pedagogut të universitetit. Kjo për faktin se para organit të akuzës ka dalë një pengesë ligjore, sipas të cilës përgjimi apo filmimi kryhet me autorizim të prokurorit të rrethit ose me vendim të gjykatës dhe materialet që janë siguruar nga përgjimi çmohen të vlefshme vetëm nëse për to është shprehur gjykata. Një vendim i tillë nuk është marrë, fakt ky që përgjimi ende nuk mund të konsiderohet provë për konsumim të veprës penale nga pedagogu. Tjetër problem i cilësuar nga juristët konsiston në faktin se, vepra për të cilën akuzohet pedagogu, “kryerje të marrëdhënieve seksuale duke shfrytëzuar detyrën” parashikon dënimin maksimal 3 vjet burg, ndërsa ligji parashikon që, përgjimet kryhen për ato vepra penale që parashikojnë 7 vjet e më shumë burg. Pritet që sot, Rado të përballet me trupin gjykues, prej nga do të mësohet dhe masa e sigurisë për te.
Gazeta panorama

Bie akuza e përdhunimit, pedagogu në arrest shtëpie

• KORÇE – Pedagogu i Infermierisë lë qelinë pas 3 ditësh. Prokuroria e Korçës ndryshoi akuzën për 46-vjeçarin Robert Rado, duke kërkuar për të masën e sigurisë “arrest shtëpiak”.

Sipas organit të akuzës, ndryshe nga se u deklarua pas arrestimit të profesorit, Rado nuk ka kryer marrëdhënie seksuale me studenten e vitit të dytë, duke e cilësuar veprën të mbetur në tentativë. Në seancën gjyqësore të vendosjes së masës së sigurisë ka marrë pjesë vetë pedagogu, i shoqëruar nga avokati i tij mbrojtës. Për shkak të faktit se bëhej fjalë për një figurë publike, gjyqtari kërkoi që masa e sigurisë të merrej me dyer të mbyllura. Në këto rrethana kanë dalë nga salla media dhe familjarë të pedagogut, ndërsa studentja dhe familjarët e saj nuk kanë qenë në këtë seancë gjyqësore. Prokurori ka përmendur provat që disponon rreth ngjarjes, duke nënvizuar se policia në sajë të bashkëpunimit me vajzën kishte mundur të realizonte përgjime dhe filmime të pedagogut dy ditë rresht. Në përgjimet e para është regjistruar biseda kur studentja dhe pedagogu lanë takimin e tyre për të nesërmen, ndërsa në përgjimin e dytë është regjistruar gjithë biseda që ata kanë zhvilluar në një dhomë moteli. Pikërisht në këtë pjesë të përgjimit pedagogu mësohet se, nuk ka pranuar që të paguhet për notën kaluese nga studentja. Gjatë bisedës ai ka kundërshtuar marrjen e lekëve edhe nga dy vajza të tjera, që kishin futur seksere studenten J.S. Këto deklarime të pedagogut kanë shërbyer që ai të shkarkohet nga akuza e korrupsionit pasiv, duke iu lehtësuar dukshëm situata. Pedagogu ka heshtur gjatë gjithë seancës. Për të ka folur avokati Robert Hyska, i cili ka hedhur poshtë të gjitha akuzat, duke i cilësuar ato të manipuluara dhe të sajuara. Ai ka lënë të kuptohet se gjithë ngjarja ka pasur stimulim nga disa punonjës të policisë. Në seancën gjyqësore dje është përmendur edhe ekzistenca e një deklarate të nënshkruar nga J.S., në të cilën studentja deklaronte se mbante përgjegjësi para ligjit, nëse ngjarja pas hetimeve cilësohet manipulim i së vërtetës. Disponimi i kësaj deklarate nga uniformat blu duket sikur përforcon pretendimin e avokatit mbrojtës. Rado u padit disa ditë më parë nga studentja e vitit të dytë në degën e Infermierisë me inicialet J. S. Sipas këtij kallëzimi pedagogu i kishte kërkuar që të kryente marrëdhënie seksuale në këmbim të një note kaluese në lëndën e fiziologjise.

Gazeta Panorama