Ditët e poezisë fillojnë me “Lushnja Poezi”

Festivali Ballkanik i Librit ka hapur siparin në skenën e teatrit “Vaçe Zela” në qytetin e Lushnjës. Në këtë edicion të parë të këtij
evenimenti të titulluar “Lushnja Poezi” janë pjesëmarrës shkrimtarë dhe poetë nga të gjitha qytetet e vendit tonë, ndërkohë që
krijimtarinë e tyre do ta paraqesin edhe poet nga Kosova, Mali i Zi dhe Maqedonia. Hapjen e kësaj veprimtarie me
përmasa të mëdha e bëri kryetari i bashkisë së qytetit të Lushnjës Albert Sanxhaku, i cili vlerësoi punën e mirë që është bërë në
organizimin e këtij festivali. “Lushnja është një ndër qytetet me vlera të mëdha historike dhe kulturore.
Përshëndes fillimin këtij festivali dhe shpresoj që “ Lushnja Poezi” të kthehet në një traditë për qytetin tonë artdashës”. Më pas
përfaqësuesi i Strugës ka përshëndetur gjithë të pranishmit që kishin mbushur sallën e teatrit “Vaçe Zela”. Ndërkohë edhe
drejtori i drejtorisë së kulturës në bashkinë e Lushnjës Alfred Dhamo e ka vlerësuar bashkëpunimin e shkëlqyer të poetëve të
cilët kanë sjellë në qytetin e Lushnjës kulturën dhe poezinë Ballkanike nëpërmjet krijimeve të tyre. “ Kjo është një iniciativë për
tu vlerësuar. Falë bashkëpunimit të mrekullueshëm të Lidhjes së Shkrimtarëve dhe Artistëve dhe punës së kryebashkiakut
Sanxhaku kemi arritur të sjellin në Lushnjë elitën e krijimtarisë ballkanike. Nëpërmjet këtij evenimenti qytetit të Lushnjës
vazhdojnë ti shtohen vlera të panumërta, duke u ngjitur në skenë artistë elitarë dhe të pakrahasueshëm në fushën e poezisë”,
u shpreh ai. Festivali Ballkanik i librit “Lushnja Poezi” do të zgjasë për tre ditë rresht, ndërkohë që kësaj veprimtarie nuk do ti
mungojnë as surprizat e shumta të cilat tashmë janë programuar për artdashësit e shumtë.